ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ: Լիբանանում առողջության ապահովագրման հայկական հիմնադրամը (Armenian Fund for Health Insurance in Lebanon, ԱՖՀԻԼ) լիբանանահայ ուսանողների համար կրթանպաստ է սահմանել: Այս մասին հայտնում է Լիբանանում «Արմենպրես»-ի թղթակիցը: Ներկայացնում ենք հոդվածն ամբողջությամբ:

«Նախորդ տարիներու նման, այս տարի եւս տեղի ունեցաւ  լիբանանահայ ուսանողներու համար ԱՖՀԻԼ-ի կողմէ կրթանպաստներու բաշխում:  Հանդիսութեան  ներկայ  գտնուեցան զբօսաշրջութեան նախարար Աւետիս Կիտանեան, Պուրճ Համուտի քաղաքապետ Մարտիկ Պօղոսեան, վարժարաններու տնօրէններ, բարեսիրական հաստատութիւններու եւ կազմակերպութիւններու ներկայացուցիչներ, ուսուցիչներ, ուսանողներ եւ ծնողներ:

  Բարի գալուստի խօսքով հանդէս եկաւ Քրիստին Սարգիսեան: Խօսք առաւ ԱՖՀԻԼ-ի տնօրէն Յակոբ Լատոյեան: Ան իր խօսքին սկիզբը ըսաւ, որ ԱֆՀԻԼ 20 տարիէ ի վեր ամէն տարի իր հասոյթէն բաժին մը կը յատկացնէ հայ աշակերտին եւ հայ համալսարանականին` քաջ գիտնալով, որ համայնքային դրութեամբ ստեղծուած երկրին մէջ ուսանողներուն տէր կանգնելու սկզբունքը առաջնահերթութիւն է, իսկ ուսանողները գաղութի վաղուան պատասխանատուները պիտի ըլլան` ներդրում բերելով վաղուան ազգային, միութենական, մարզական, ընկերային, մշակութային եւ այլ մարզերուն մէջ:

Ապա խօսք առաւ զբօսաշրջութեան նախարար Աւետիս Կիտանեան:

Ան  բարձր գնահատեց  ԱՖՀԻԼ-ի  տնօրէնին եւ  վարչականներուն, անձնակազմին աշխատանքը, որովհետեւ յաջողած են 20 տարի շարունակ բարձր ծառայութիւն տրամադրել, ձեռք երկարել եւ օժանդակել 110 ուսանողներուն, ապա աշխատանքին ծիրը ընդլայնելով հասնիլ Հայաստան:

Նախարար Ա. Կիտանեան  նաեւ  գնահատեց ուսանողները ու յատկապէս ծնողները, որոնք մեծ զոհողութիւններով կը յաջողին իրենց զաւակներուն ապահովել համապատասխան կրթութիւն: 

Նախարար Կիտանեան  դիտել տուաւ, որ   110 ուսանողներու տրամադրուած գումարը թէեւ կրնայ համեստ ըլլալ, բայց անհրաժեշտ է, որովհետեւ կու գայ հայկական հաստատութենէն, որ իր շահը կը գոյացնէ Լիբանանի հայ գաղութէն, որ այդ շահը կը վերադարձնէ գաղութի զաւակներու նպատակներու իրականացման: Ան եզրափակեց խօսքը ըսելով. «ԱՖՀԻԼ-ը, կուսակցութիւնները, միութիւնները, դպրոցները, քաղաքապետարանը, բոլոր կազմակերպութիւնները այս գաղութի պահպանման, զարգացման, բարգաւաճման, հաստատ քայլերով շարունակութեան մէջ տեղ ու դեր ունենալու, մասնակցութիւն ունենալու պարտաւորութեան տակ ենք»:

Ձեռնարկի աւարտին բոլոր ուսանողները ստացան իրենց կրթանպաստները»: