Չինաստանում ռոբոտը պարեկային ծառայության է անցել երկաթուղային կայարանում
ԵՐԵՎԱՆ, 18 ՓԵՏՐՎԱՐԻ, ԱՐՄԵՆՊՐԵՍ: Չինաստանի Խենան նահանգի երկաթուղային կայարանում պարեկային ծառայության է անցել առաջին ռոբոտը: Ինչպես հաղորդում է «Արմենպրես»-ը` վկայակոչելով «ՌԻԱ նովոստի» գործակալությունը, ռոբոտ-ոստիկանը հերթապահության է անցել արագընթաց գնացքների կայարանի սպասման սրահում: Ռոբոտը կարողանում է հսկել տարածքն առանց մարդկային օգնության: Նա կարողանում է պատասխանել նաեւ ուղեւորների հարցերին, ճանաչել մարդկանց դեմքերը, նախազգուշացնել սպասվող հրդեհի մասին: Առաջիկա շաբաթվա ընթացքում նա կաշխատի թեստային ռեժիմով, ապա կշարունակի հերթապահել նաեւ գիշերային ժամերին:
China News Service-ի հրապարակած լուսանկարներից երեւում է, որ սեւ-սպիտակ ռոբոտը շարժվում է անիվների վրա:
2016 թվականի սեպտեմբերի վերջին, Չինաստանի քաղաքներից մեկի օդանավակայանում եւս ռոբոտ է ծառայության անցել: Նրա վրա տեղադրված էին տեսախցիկներ, եւ նա կարողանում էր ճանաչել ու լուսանկարել ուղեւորների դեմքերը:
Բաժանորդագրվեք մեր ալիքին Telegram-ում