Քաղաքացիների դիմելիությունը պոլիկլինիկաներ վերջին տարիներին ավելացել է
ԵՐԵՎԱՆ, 17 ՓԵՏՐՎԱՐԻ, ԱՐՄԵՆՊՐԵՍ։ Առաջնային օղակի բուժսպասարկման կենտրոններ՝ պոլիկլինիկաներ դիմող քաղաքացիների թիվը վերջին երեք տարիների ընթացքում աճել է. սա առողջապահության նախարարության առանցքային ռազմավարություններից է բխում։
«Արմենպրես»-ի հաղորդմամբ՝ փետրվարի 17-ին լրագրողների հետ հանդիպման ժամանակ այս մասին ասաց Առողջապահության նախարարության վնասվածքաբանության, օրթոպեդիայի, այրվածքների և ռադիոլոգիայի տնօրեն Վաչագան Այվազյանը։ Նրա խոսքով՝ վերջին երեք տարիներին գրանցված վնասվածքների, թունավորումների և այրվածքների թվերը համարյա նույնն են։
«Պոլիկլինիկաներ դիմող անձանց քանակը ավելի է աճել այս տարիների ընթացքում, քան հիվանդանոցներ դիմողներինը։ Սա մեր նախարարության հիմնական ռազմավարությունն է, քանի որ ստացիոնար բուժումը թանկ արժե և պետք չէ փոքրիկ կոտրվածքների և վնասվածքների համար հոսպիտալացնել»,- նշեց Այվազյանը։
Քանի որ պրոֆիլակտիկ բուժումը զարգանում է, պոլիկլինիկաներ դիմողների թիվն էլ ավելի շատանում է։ Վնասվածքաբանի տվյալներով՝ մեկուկես ամսվա ընթացքում իրենց կենտրոն է դիմել 138 հիվանդ, որոնցից 88-ը ստացել են ստացիոնար բուժում, իսկ 50-ը՝ ամբուլատոր։
Կանայք ավելի շատ են, քան տղամարդիկ։ Տարեցների մոտ կոտրվածքներ ստանալու հավանականությունը շատ ավելի մեծ է, քանի որ տարիների ընթացքում մարդկային կմախքն ավելի փխրուն է դառնում:
Կոտրվածքների դեպքերը երեխաներ խմբում կազմում են 14 %։ Ընդհանուր առմամբ ավելի շատ լինում են վերջույթների կոտրվածքներ, որոնց 66 %-ն է վիրահատական միջամտության կարիք ունենում։
Բաժանորդագրվեք մեր ալիքին Telegram-ում