Գյումրիում տեղի ունեցավ «Կարմիր սրտերի Ջեքը» ֆիլմի ցուցադրությունը
22:00, 15 Փետրվար 2017
ԳՅՈՒՄՐԻ, 15 ՓԵՏՐՎԱՐԻ, ԱՐՄԵՆՊՐԵՍ : Գյումրիի «Հոկտեմբեր» կինոթատրոնում փետրվարի 15-ին տեղ ունեցավ ամերիկացի ռեժիսոր Ջանեթ Գրիլոյի «Կարմիր սրտերի Ջեքը» ֆիլմի ցուցադրությունը: Ցուցադրությունը տեղի ունեցավ Հայաստանում ԱՄՆ դեսպանատան նախաձեռնությամբ` «Մարդկային պատմությունների խճանկար» խորագրի ներքո անցկացվող ամերիկյան ֆիլմերի ցուցաշարի շրջանակներում: Փետրվարի 13-ից մարտի 31 ընկած հատվածում, փառատոնի շրջանակներում, հայ հանդիսատեսին կներկայացվի նոր արտադրության 33 ամերիկյան ֆիլմ:
Ցուցաշարում ընդգրկված ֆիլմերում անդրադարձ է կատարվում մարդկային տարբեր ճակատագրերի: Ցուցաշարի մեկնարկը տրվել է «Կարմիր սրտերի Ջեքը» ֆիլմի ցուցադրությամբ: Ֆիլմը պատմում է աուտիզմով հիվանդ երեխայի՝ Գլորիի մասին: Ջեքը համառ դեռահաս է, ով փախել է տանից և թաքնվում է իր ծառայողից: Փողոցում մեծացած, անտեսված երեխան, արհեստավարժ խնամատար է ձևանում ի վերջո կապվում 11-ամյա Գլորիի հետ:
Ամերիկյան ֆիլմերի ցուցաշարի շրջանակում մեկ շաբաթով Հայաստան եկած «Կարմիր սրտերի Ջեքը» ֆիլմի ռեժիսոր և պրոդյուսեր Ջանեթ Գրիլոն Գյումրի ևս այցելեց, իսկ ֆիլմի դիտումից հետո քննարկումներ ունեցավ հանդիսատեսի հետ:
«Արմենպրես»-ի հետ զրույցում Ջանեթ Գրիլոն ընդգծեց, որ ֆիլմը, որ ԱՄՆ-ում հեռարձակվել է Lifetime հեռուստատեսությամբ և ունեցել մոտ մեկ միլիոն դիտում, իսկ դրանից բացի ցուցադրվել է տարբեր կինոթատրոններում ինչպես ԱՄՆ-ում, այնպես էլ Կանադայում, Ավստրալիայում ու Նոր Զելանդիայում, Հայաստանում, արդեն երկրորդ ցուցադրություն է Երևանից հետո, որ անցնում է լիքը դահլիճով, իսկ շատերը Գյումրիում ֆիլմը դիտեցին հոտնկայս, ինչը ռեժիսորն ամենամեծ հաջողությունն է համարում: «Պատմությունը համամարդկային է՝ բոլորին հուզող: Սովորելու ու սովորեցնող շատ բան է տալիս: Սա թեև դեռահասների մասին է, բայց բոլորի համար է»,-«Արմենպրես»-ի հետ զրույցում նշեց Ջանեթ Գրիլոն:
Ֆիլմերը կցուցադրվեն Երևանում, Գյումրիում ու Վանաձորում:
Արմենուհի Մխոյան
Բաժանորդագրվեք մեր ալիքին Telegram-ում