Վարչապետը նախարարին հանձնարարեց հստակ քայլեր ձեռնարկել մասսայական սպորտի զարգացման ուղղությամբ

ԵՐԵՎԱՆ, 9 ՓԵՏՐՎԱՐԻ, ԱՐՄԵՆՊՐԵՍ: Կառավարությունում Սպորտի և երիտասարդության հարցերի նախարարի հաշվետվության ժամանակ պարզվել են, որ ոլորտում կան համակարգային խնդիրներ՝ կապված քաղաքականության և կառավարման իրականացման հետ: Ելնելով դրանից՝ ՀՀ վարչապետ Կարեն Կարապետյանը Կրթության և գիտության, Սպորտի և երիտասարդության հարցերի նախարարներին հանձնարարեց մեկամսյա ժամկետում վերանայել  կրթական բոլոր մակարդակների ֆիզիկական կուլտուրային վերաբերող կրթական ծրագրերը և ներկայացնել առաջարկություն՝ այսուհետ դրանք համատեղ հաստատելու հնարավորության վերաբերյալ: «Անհրաժեշտ է գույքագրել հանրակրթական ուսումնական, միջին մասնագիտական և բարձրագույն ուսումնական հաստատություններում առկա սպորտային դահլիճները և մարզային գույքը, ՀՀ կառավարության աշխատակազմ ներկայացնել առկա խնդիրները և հնարավոր լուծման տարբերակները »,- «Արմենպրես»-ի հաղորդմամբ, ասաց վարչապետը:

Միաժամանակ, Կարեն Կարապետյանը ՀՀ տարածքային կառավարման նախարարին հանձնարարեց մեկամսյա ժամկետում ուսումնասիրել մարզպետարանների և համայնքների ենթակայությամբ գործող մանկապատանեկան մարզադպրոցների գործունեության կազմակերպման արդյունավետությունը, և ՀՀ սպորտի և երիտասարդության հարցերի նախարարության հետ համատեղ մշակել հստակ չափորոշիչներ այդ հաստատությունների կառավարման և գործունեության կազմակերպման համար:

«Կրթական ծրագրերն ունիֆիկացված չեն, տարբեր տեղեր տարբեր կրթական ծրագրեր կան, ստանդարտներ գոյություն չունեն մասսայական սպորտի վերաբերյալ: Պարոն Ռոստոմյան, առ այսօր մենք որևէ տեղեկատվություն ձեզնից  չենք ստացել, թե ինչպես ենք ակտիվացնելու գյուղական համայնքներում սպորտդահլիճների կառուցումը: Ուշադիր եղեք»,- դիմելով նախարար Հրաչյա Ռոստոմյանին՝ ասաց Կարեն Կարապետյանը: