ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: «Արմենպրես» լրատվական գործակալության «Մանկական բեսթսելեր» հեղինակային նախագիծը ներկայացնում է մեկ ամսվա ընթացքում ամենից շատ վաճառված մանկական գրքերի ցանկը:

Վարկանիշային աղյուսակի առաջին հորիզոնականում «Հեքիաթներ արքայադուստրերի մասին» գիրքն է: Այն մեծ մասսայականություն է վայելում փոքրիկների շրջանում: «Արքայադուստր Լինդան», «Կեռնեխ թագավորը» և «Ոսկեծամիկը» հեքիաթները դաստիարակչական են, անչափ հուզիչ և գեղեցիկ: Այս բոլոր հեքիաթները մեկտեղված են վերոնշյալ գրքում:

«Երեք պատմվածք Շերլոք Հոլմսի արկածներից» գիրքն այս ամիս բարելավել է իր դիրքերը` հայտնվելով երկրորդ հորիզոնականում: Գրքում ներկայացված են Արթուր Կոնան Դոյլի՝ շատերից սիրված հերոս Շերլոք Հոլմսի զանազան արկածները:

Երրորդ տեղում Հովհաննես Թումանյանի «Հեքիաթներ»-ն են: Թումանյանի  ստեղծագործությունները, մասնավորապես, հեքիաթները, որոնք թարգմանվել են աշխարհի տարբեր լեզուներով, մշտապես հետաքրքրել են ընթերցողներին: Դրանք միշտ պահանջված են բոլոր սերունդների կողմից, հաճույքով են ընթերցում նաև մեծահասակները: Հեքիաթների հիմքում ընկած են ժողովրդական թեմաներն ու պատումները:

Մանկական բեսթսելերի չորրորդ հորիզոնականում  Հանս Քրիստիան Անդերսենի «Հեքիաթներ»-ն են, որոնք քաջ հայտնի են բոլոր փոքրիկներին ոչ միայն գրքի, այլև մուլտֆիլմերի ու գեղարվեստական լիամետրաժ ֆիլմերի տեսքով, քանի որ դրանց զգալի մասն էկրանավորվել է:

Հինգերորդ տեղում «Հայ ժողովրդական հեքիաթներ»-ն են: Գրքում ներկայացված են հեքիաթներ, որոնք չափազանց հետաքրքիր են, դաստիարակչական:

Քնելուց առաջ հեքիաթներ լսել սիրում են բոլոր փոքրիկները: «Բուկինիստ»-ի «Հեքիաթներ քնելուց առաջ» ժողովածուն վեցերորդն է մեր ցանկում: Այն ներառում է պարտադիր ընթերցելու յուրահատուկ հեքիաթներ:

Յոթերորդ տեղում «Զանգակ» հրատարակչության «Լինում է, չի լինում» հեքիաթների պատկերազարդ ժողովածուն է: Հանս Քրիստիան Անդերսենի, Գրիմ եղբայրների, Շառլ Պերոյի, Գաբրիել դը Վիլնյովի հեքիաթների հերոսները փոքրիկների ամենասիրելիներն են: Այս հեքիաթների նոր նկարազարդումներն էլ ավելի հետաքրքիր են դարձնում ընթերցումը:

«Արև, արև, եկ, եկ» մանկական բանաստեղծությունների ժողովածուն զիջել է դիրքերը և ութերորդն է: Գրքում զետեղված են տարբեր սերնդի հայ մանկագիրների ստեղծագործություններ:

Իններորդ հորիզոնականում «ՄՀՄ գրատան» հրատարակած Հովհաննես Թումանյանի «Հեքիաթների մոլորակ» ժողովածուն է: 

Ամենավաճառվածների ցանկը եզրափակում է «Կախարդական զամբյուղը» գիրքը, որում ներառված են աշխարհի ժողովուրդների լավագույն հեքիաթները, որոնք ոչ միայն կօգնեն ներթափանցել կախարդական աշխարհ, այլև դառնալ գրքի հերոսը:

Վարկանիշային ցուցակի կազմման հարցումներին մասնակցել են «Բուկինիստ» (53-74-13), «Նարեկ» (51-91-36), «Զանգակ» (23-26-49) գրախանութները,  7-րդ տաղավար-գրախանութը (077-24-54-81): Հարցման ժամանակ հաշվի չեն առնվել դասագրքերը:

Տեղ	Գիրք		Հրատ.	Քանակ
1		«Հեքիաթներ արքայադուստրերի մասին»	Բուկինիստ	43
2		«Երեք պատմվածք Շերլոք Հոլմսի արկածներից»	Անդրանիկ	38
3		Հովհաննես Թումանյան «Հեքիաթներ»	Արևիկ	38
4		Հանս Քրիստիան Անդերսեն «Հեքիաթներ»	Արևիկ	35
5		«Հայ ժողովրդական հեքիաթներ»	Հաշ ընդ Հաշ	34
6		«Հեքիաթներ քնելուց առաջ»	Բուկինիստ	32
7		«Լինում է չի լինում» պատկերազարդ հեքիաթներ	Զանգակ	32
8		«Արև, արև, եկ, եկ»	Էդիթ պրինտ	32
9		Հովհաննես Թումանյան  «Հեքիաթների մոլորակ»	ՄՀՄ	30
10		«Կախարդական զամբյուղ». Աշխարհի ժողովուրդների հեքիաթներ	Արևիկ	20

«Մանկական բեսթսելերը» ներկայացրեց Անժելա Համբարձումյանը