Սպասվող լրահոս. 31.01.2017
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` հունվարի 31-ին, տեղի կունենա Հայաստանի արտաքին գործերի նախարար Էդվարդ Նալբանդյանի մամուլի ասուլիսը: Նախարարը կներկայացնի 2016 թվականի դիվանագիտական աշխատանքը:
ՀՀ արտակարգ իրավիճակների նախարարության Ճգնաժամային կառավարման պետական ակադեմիայում կկայանա կրթօջախի 25-ամյակին նվիրված տոնական միջոցառում: Տոնական արարողության ընթացքում կլինեն գեղարվեստական ներկայացումներ, կհանձնվեն շքանշաններ, պատվոգրեր, շնորհակալագրեր:
ՀՀ մշակույթի նախարար Արմեն Ամիրյանն ու «Փյունիկ» հիմնադրամի նախագահը կստորագրեն համագործակցության հուշագիր՝ «Մշակութային կանգառ» ծրագրի հետ կապված: Հիմնադրամը 73 միլիոն դրամ կհատկացնի նախարարության «Մշակութային կանգառ» ծրագրին՝ դառնալով դրա գլխավոր հովանավորը։ «Մշակութային կանգառ» ծրագրով՝ Հայաստանի պետական բոլոր երաժշտաթատերախմբերը հյուրախաղերով հանդես կգան Հայաստանի մարզերում և Արցախում:
Ի դեպ, «Մշակութային կանգառ» ծրագրի շրջանակում այսօր` հունվարի 31-ին, կմեկնարկեն համերգային շրջագայությունները Հայաստանի տարբեր մարզերով: Մեկնարկը կտա Հայաստանի պետական ֆիլհարմոնիան՝ Աշտարակում և Ապարանում: Հայպետֆիլհարմոնիայի ֆոլկ-մոդեռն ժող.գործիքների նվագախումբն աշտարակցի հանդիսատեսին կներկայանա Ներսես Աշտարակեցու անվան թիվ 1 հիմնական դպրոցի դահլիճում: Նույն օրը համերգը կշարունակվի Ապարան քաղաքի մշակույթի տանը:
Երևանում կանցկացվի միջազգային համաժողով՝ «Կանանց նկատմամբ բռնության կանխարգելման եվրոպական փորձի փոխանցումը» թեմայով: Ներկա կլինեն ՀՀ մարդու իրավունքների պաշտպան Արման Թաթոյանը, ՀՀ արդարադատության նախարար Արփինե Հովհաննիսյանը, ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանը, ՄԱԿ-ի մշտական համակարգող Բրեդլի Բուզետտոն և ԵԽ երևանյան գրասենյակի ղեկավար Նատալյա Վուտովան:
Այսօր կտրվի ԵՄ կողմից ֆինանսավորվող «Վերաինտեգրման քաղաքականություն վերադարձող հայ միգրանտների համար» նոր ծրագրի մեկնարկը: Ծրագրի նպատակն է հզորացնել կառավարման ոլորտում Հայաստանի կարողությունները՝ կիզակետում պահելով վերաինտեգրմանն ուղղված գործողությունները:
ՀՀ սպորտի և երիտասարդության հարցերի նախարարությունում կանցկացվի սեմինար-քննարկում՝ հակադոպինգային կանոնների խախտումների և կիրառվող պատժամիջոցների վերաբերյալ: Հիմնական զեկույց կներկայացնի ՀՀ սպորտի և երիտասարդության հարցերի նախարարության Սպորտային բժշկության և հակադոպինգային ծառայության հանրապետական կենտրոնի հակադոպինգային ծառայության պետ Արեգ Հովհաննիսյանը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
Բաժանորդագրվեք մեր ալիքին Telegram-ում