ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: Լիբանանում` Հայկազյան համալսարանում տեղի ունեցած հուշամատյանի շնորհանդեսի վերաբերյալ Բեյրութում «Արմենպրես»-ի թղթակցի նյութ ներկայացնում ենք դասական ուղղագրությամբ.

 ՀԱՅԿԱԶԵԱՆ ՀԱՄԱԼՍԱՐԱՆԻ ՄԷՋ  ՇՆՈՐՀԱՆԴԷՍ  ՆՈՒԻՐՈՒԱԾ

«ՏԱՐԵԳՐՈՒԹԻՒՆ   ՀԱՅ ԱՒԵՏԱՐԱՆԱԿԱՆ   ԲԵԹԷԼ  ՎԱՐԺԱՐԱՆԻ, 1923-2013»  ՅՈՒՇԱՄԱՏԵԱՆԻՆ

«Հինգշաբթի, 26  Յունուար 2017,  երեկոյեան  ժամը  7-ին,  Հայկազեան  համալսարանի սրահին մէջ կայացաւ «Տարեգրութիւն  Հայ  Աւետարանական Բեթէլ Վարժարանի,1923-2013» յուշամատեանին  շնորհանդէսը:

Պատմական խիստ կարեւոր այս արժեքաւոր  հրատարակութիւնը Բեթէլ  վարժարանի երթը նոր հորիզոններ սլանալու յանձնառութիւն  մըն է  միաժամանակ:

Ի ներկայութիւն  Մերձաւոր Արեւելքի Հայ Աւետարանական Եկեղեցիներու Միութեան նախագահ վերապատուելի Մկրտիչ Գարակէօզեանի,  Սուրիոյ  Հայ  Աւետարանական Համայնքի   համայնքապետ վերապատուելի Յարութիւն Սելիմեանի,  Հայկազեան  Համալսարանի  նախագահ Վերապատուելի  Փօլ  Հայտոսթեանի,  Լիբանանի մէջ  Հայաստանի դեսպանատան  հիւպատոս  Աշոտ Վարդանեանի,  կցորդ Վլատիմիր Պօղոսեանի եւ  մշակութասէր ընտրանիի  մը,  ՀՀ Սփիւռքի Ուսումնասիրութեանց Կեդրոնի վարիչ դոկտ. Անդրանիկ  Տաքեսեան,   բարի  գալուստի  իր խօսքին մէջ   արժեւորեց  յուշագրական գրականութեան  դերակատարութիւնը, յատկապէս այսօր, երբ բազմաթիւ վտանգներ  կը սպառնան  Միջին Արեւելքի   հայկական գաղութներուն: Ան նկատել տուաւ, թէ  արխիւներու  չգոյութեան  պատճառով,հաւաքական  յիշողութիւնը  կորուստէ  փրկելու   միջոցները  մասնակիօրէն խիստ մատչելի դարձած են սփիւռքեան մեր կեանքին  մէջ: Հետեւաբար, յատկապէս այս տխուր  իրականութեան  մէջ անհրաժեշտ է դիտել  յուշամատեանին հրատարակութիւնը, անոր նուիրուած  շնորհանդէսը:

Ներկաները  յոտնկայս  ունկնդրեցին Բեթէլ  վարժարանի  քայլերգը, կատարողութեամբ Արմանի Սելիմեանի, դաշնամուրի ընկերակցութեամբ՝ տիկին Շողակաթ Աբարդեան-Սելիմեանի:

Հայկազեան  համալսարանի  նախագահ  վերապատուելի Դոկտ. Փօլ Հայտոսթեանը, ընդգծեց, թէ Հայկազեան  համալսարանը  շատ յաճախ   իբրեւ տուն կը  ներկայացուի մեր  առօրեային մէջ, առանց  յստակացնելու պատճառները: Հայկազեան համալսարանը մտքի, լոյսի, հաւատքի եւ ներշնչումի տուն  ըլլալով, այսօր  իր   երդիքին տակ  կը  ներկայացնէր  նոր  հրատարակութիւն մը:« Այսօր  կը ներկայացնենք  Ձեզի  հատոր մը, որ  կը պատմէ  երբեմնի  հայ տարագիր  անտունին կրթա-դաստիարակչական  տուն տալու մասին: Բեթէլը,   իբրեւ Աստուծոյ  տունը,  հարազատութիւն  կը սփռէր  երկար տարիներ եւ կը շարունակէ մինչեւ  օրս, նոր  եւ անպատմելի տնազրկութեան մթնոլորտի մէջ»:  Վերապատուելի Հայտոսթեան գնահատանքի խօսք ուղղեց  այն  նուիրեալ ծառաներուն, որոնք մասնակցեցան Բեթէլը  լուսաւորութեան  տուն դարձնելու աշխատանքին:

Ողջոյնի խօսքով հանդէս եկաւ   վերապատուելի  Յարութիւն Սելիմեանը: Ան նշեց, թէ  յուշամատեանին  հրատարակութիւնը ինքնին ապացոյց է  Հայ  Աւետարանական  հոգեմտաւոր դաստիարակութեան  եւ Հայ Աւետարանական պատմութեան  մէջ իրենց   ընծայաբերող  տիտաններու կատարած  կոթողային առաքելութեան: Վերապատուելի Սելիմեան մէկ առ մէկ  շնորհակալութիւն յայտնեց յուշամատեանի  խմբագիր Յակոբ Չոլաքեանին,  յուշամատեանի պատրաստութեան նպատակով  ստեղծուած  յանձնախումբի անդամներուն,  Լեւոն Շառոյեանին, Հայկազեան համալսարանի նախագահ  վերապատուելի Փօլ Հայտոսթեանին, դոկտ. Անդրանիկ Տաքեսեանին,   Միացեալ Նահանգներու  Հայ Աւետարանչական  Ընկերակցութեան գործադիր  տնօրէն  Զաւէն Խանճեանին սոյն  հրատարակութիւնը իրականացնելու առիթով իրենց բերած  գնահատելի մասնակցութեան համար:  Միաժամանակ, ան լուսարձակի տակ առաւ Հալէպի ներկայ ճգնաժամը  եւ Բեթէլի նման հաստատութիւններու անփոխարինելի ծառայութիւնը եւ անցեալէն  դէպի ապագայ երկարող ներշնչման առաքելութիւնը:

Առնօ  Պապաճանեանի  էլեկիան կատարեցին   Լոռի  Պիլալաեան եւ Դալար Հայտոսթեան:

Լիբանանահայ հրապարակագիր տիար  Ահարոն Շխրտըմեան ներկայացուց  յուշամատեանը,  ընդգծելով, որ սոյն հրատարակութիւնը   գիրք մը   ըլլալէ աւելի՝ ապրողներուն կը  յղէ  պատգամ մը  վրէժ  լուծելու  ցեղասպան թուրքէն: Ան համառօտակի ներկացացուց  Բեթէլի բոլորած  ճանապարհը,  հիմնադրութեան օրերէն մինչեւ ներկան, շեշտելով որ Բեթէլ վարժարանը եղած է  հոգեւոր եւ  հայեցի դաստիարակութիւնը  հայ դպրոցի ճանապարհով  վերապրող հայութեան  հաղորդելու  օճախ:

Ահարոն Շխրտըմեան  ընդգծեց, թէ իննսունամեայ այս  յուշամատեանը  նոր մարտահրաւէրներ  դիմագրաւելու  պատրաստակամութիւն է միաժամանակ եւ ապացոյց՝ ստեղծարար  մեր ժողովուրդին նկարագիրին: Ան  շնորհաւորեց Սուրիոյ  Հայ Աւետարանական   համայնքապետ  վերապատուելի Յարութիւն  Սելիմեանը եւ ամբողջ  համայնքը նմանօրինակ կոթողային  յուշամատեան մը լոյս ընծայելու գաղափարը   յղանալնուն, ինչպէս նաեւ  բոլոր անոնց,որոնք մասնակցութիւն  ունեցան այս երախտաշնորհ յուշամատեանին  պատրաստութեան եւ հրատարակութեան աշխատանքներուն:

  Հանդիսութեան եզրափակիչ խօսքը  արտասանեց ՄԱՀԱԵՄ-ի նախագահ վերապատուելի  Մկրտիչ  Գարակէօզեան, Բեթէլի պատմութեան յուշագրութեան ընդմէջէն քաղելով պատմութիւնը յիշելու, անկէ թելադրուելու  եւ  անով ուղղելու գրաւականը: Ան շնորհաւորեց Բեթէլ Եկեղեցին ու վարժարանը իրենց նուիրական աշխատանքին համար եւ ներկայացուց իր շնորհաւորական մաղթանքը ապագային նկատմամբ:     

Ապա տեղի ունեցաւ  յուշամատեանի  շնորհանդէսին առիթով կարկանդակի հատում  եւ հիւրասիրութիւն: Այս  միջոցին,  փափաքողները,  վերապատուելի Յարութիւն Սելիմեանի  մակագրութեամբ,  յուշամատեանի օրինակներ ստացան՝ անվճար»: