Ժամանակը Երևանում՝ 11:07:36,   21 Հունվար

Օքսֆորդում նախատեսվում է հրատարակել հայկական ձեռագրերի թվայնացված ձեռնարկ

 Օքսֆորդում նախատեսվում է հրատարակել հայկական ձեռագրերի թվայնացված 
ձեռնարկ

ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: Վիեննայի համալսարանի Պատմական և մշակութային ուսումնասիրությունների ֆակուլտետի Բյուզանդական և հունական ժամանակակից ուսումնասիրությունների ամբիոնը հունվարի 18-ին կազմակերպել էր հայագիտական ուսումնասիրություններին նվիրված միջոցառում, որին մասնակցել է նաև Ավստրիայում ՀՀ դեսպան Արման Կիրակոսյանը։

Ինչպես «Արմենպրես»-ին տեղեկացրին ՀՀ ԱԳՆ մամուլի, տեղեկատվության և հասարակայնության հետ կապերի վարչությունից, միջոցառմանը հայկական ձեռագրերի թեմայով դասախոսություն է կարդել Օքսֆորդի և Վիեննայի համալսարանների պրոֆեսոր Էմիլիո Բոնֆիլիոն, ով, մասնավորապես, ներկայացրել է հայ ձեռագրական մշակույթի զարգացումը պատմության տարբեր ժամանակաշրջաններում՝ ընդգծելով դրանց պատմական, գրական և մշակութային արժեքը, ինչպես նաև զարդարվեստի նշանակությունը: Էմիլիո Բոնֆիլիոն տեղեկացրել է նաև, որ Օքսֆորդում նախատեսվում է հրատարակել հայկական ձեռագրերի թվայնացված ձեռնարկ:

Դասախոսությանը ներկա էին ավստրիացի գիտնականներ, հասարակական շրջանակների և հայ համայնքի ներկայացուցիչներ:

Վիեննայի համալսարանում դեսպան Կիրակոսյանը հանդիպում է ունեցել նաև Պատմական և մշակութային ուսումնասիրությունների ֆակուլտետի դեկան, դոկտոր Լիոբա Թայսի հետ։ Վերջինիս հետ քննարկվել են հայագիտության բնագավառում հայ և ավստրիացի գիտնականների միջև համագործակցությունը խորացնելու հարցերը:

Տեղեկանք. Վիեննայի համալսարանի Պատմության և մշակութային ուսումնասիրությունների ֆակուլտետի Բյուզանդական և հունական ժամանակակից ուսումնասիրությունների ամբիոնի ուսումնական ծրագրերի շրջանակներում հայկական ձեռագրերը կարդալու նպատակով դասավանդվում է գրաբար:




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ