ԸՕ-ն ընձեռում է ազատ և թափանցիկ ընտրություններ անցկացնելու բոլոր հնարավորությունները. Խոսրով Հարությունյան
ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: Հայաստանի Հանրապետության Ընտրական նոր օրենսգիրքն էապես կատարելագործվել է և ստեղծում է բոլոր հնարավորություններն ազատ և թափանցիկ ընտրությունների անցկացման համար: Հունվարի 20-ին լրագրողների հետ հանդիպմանը նման կարծիք հայտնեց ԱԺ ՀՀԿ խմբակցության պատգամավոր Խոսրով Հարությունյանը: «Նախ ողջունելի է այն հանգամանքը, որ Ընտրական օրենսգիրքն ընդունվեց քաղաքական մեծամասնության և ընդդիմության միջև աննախադեպ կոնսենսուսի արդյունքում: Իշխանություններն օրենսգրքում ամրագրեցին գրեթե բոլոր այն պահանջները, որոնք ներկայացնում էր ընդդիմությունը և այն մեխանիզմները, որոնք ընտրական գործընթացի նկատմամբ հանրության վստահությունը կբարձրացնեն»,- «Արմենպրես»-ի հաղորդմամբ` ասաց պատգամավորը:
Խոսրով Հարությունյանը նշեց, որ Հայաստանը թևակոխում է զարգացման նոր փուլ` հավելելով, որ քաղաքական մեծամասնությունը շատ լավ է հասկանում, թե որքան կարևոր նշանակություն ունի ընտրական գործընթացների նկատմամբ հանրության վստահությունը բարձրացնելը: «Հիմա մենք բոլորս կանգնած ենք կարևոր քննություն բռնելու առաջ: Արդյոք կկարողանա՞նք մենք ճիշտ օգտագործել այն իրավական լուրջ հնարավորությունները, որ մեզ ընձեռում է Ընտրական օրենսգիրքը: Սա շատ կարևոր հարց է և մենք` իշխանություն, թե ընդդիմություն, պետք է բռնենք այս քննությունը»,- շեշտեց Հարությունյանը:
Նրա խոսքով` հարկավոր է հանրությանը հրամցնել ընտրություններ, որի արդյունքները հանրության մեծամասնության մոտ դժգոհություն չեն առաջացնի:
Բաժանորդագրվեք մեր ալիքին Telegram-ում