Հայաստանի ռուսական ռազմակայանում մեկնարկել Է հրամանատարական կազմի ուսումնական հավաքը
13:31, 19 Հունվար 2017
ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: Հայաստանի ռուսական ռազմակայանում ուսումնական հավաք Է սկսվել Գյումրիի եւ Երեւանի կայազորների զորամասերի հրամանատարական կազմի հետ:
Ինչպես «Արմենպրես»-ին տեղեկացրել են ՌԴ Հարավային ռազմական օկրուգի մամուլի ծառայությունից, պարապմունքները տեղի կունենան երկու փուլով: Առաջին փուլի ընթացքում կանցկացվեն դասախոսություններ եւ հրահանգչական-մեթոդական պարապմունքներ, որոնց ընթացքում զինծառայողները կծանոթանան ռազմերթերի կատարման եւ բարձրլեռնային տեղանքի բարդ կլիմայական պայմաններում մարտական պատրաստության պարապմունքներում ուսումնական գործընթացի կազմակերպմանը ներկայացվող ժամանակակից պահանջներին:
«Կամխուտ» եւ «Ալագյազ» զորափորձարաններում գործնական պարապմունքների ընթացքում սպաները նորմատիվներ կհանձնեն հատուկ մարտավարական, կրակային պատրաստությունից եւ մարտական մեքենաների սպառազինությունից, ավտոմոբիլային եւ զրահատանկային տեխնիկայի վարումից՝ տարբեր արգելքների հաղթահարմամբ:
Պարապմունքների անցկացման ընթացքին հետեւում են անօդաչու թռչող սարքերի հաշվարկները՝ հետախուզության եւ կապի արդիական համալիրների օգտագործմամբ: Գործնական պարապմունքներն անցկացվում են գիշերային ու ցերեկային ժամերին՝ ծովի մակարդակից 1,5 հազարից մինչեւ 2,5 հազար մետր բարձրությունների վրա, կլիմայական «Էքստրեմալ» պայմաններում, երբ օդի ջերմաստիճանն ըստ Ցելսիուսի ցածր Է մինուս 20 աստիճանից, իսկ քամու պոռթկումները հասնում են վայրկյանում ավելի քան 15 մետրի:
Ուսումնական միջոցառումներում ներգրավված են 150-ից ավելի զինծառայողներ, շուրջ 30 միավոր սպառազինություն եւ ռազմական տեխնիկա, այդ թվում՝ կապի, հետախուզության արդիական համալիրներ եւ բանակային օդուժի Մի-8ՄՏ ռազմափոխադրական ինքնաթիռներ:
Բաժանորդագրվեք մեր ալիքին Telegram-ում