ԳՅՈՒՄՐԻ, 19 ՀՈՒՆՎԱՐԻ, ԱՐՄԵՆՊՐԵՍ: Հայաստանում գտնվող ռուս ուղղափառները հունվարի 18-ի կեսգիշերին մոտ նշեցին Քրիստոսի Մկրտության տոնը: 

Ռուս ուղղափառ եկեղեցու հետևորդներն արդեն ութերորդ անգամ է, որ Հայաստանում նշում են ուղղափառ եկեղեցու  գլխավոր տոներից մեկը:

Այս տարի եկեղեցական տոնին մասնակցելու նպատակով Գյումրիում էին Հայաստանում Ռուսաստանի Դաշնության դեսպանության ներկայացուցիչները, նրանց ընտանիքների անդամները, Հայաստանում զինվորական ծառայություն  անցկացնող զինվորականները, սպաները, հյուրեր: Ռուս ուղղափառ եկեղեցու հոգևոր հովիվ Հայր Անդրեյի ձեռամբ «Չերքեզի ձոր» կոչվող տարածքում հատուկ ավազանների ջուրն օրհնվելուց հետո բոլոր ցանկացողներին հնարավորություն տրվեց մտնել ավազան:  Առաջինը մկրտության ջուրը, հանուն Հոր և Որդու, և Սուրբ Հոգու,  մտնելու հնարավորությունը Հայր Անդրեյինն էր, ով մեկնելով տոնի խորհուրդը՝ նշեց, որ Հորդանան գետի ջրերում Քրիստոսին մկրտեց Հովհաննես Մկրտիչը։ Մեծ ջրօրհնեքը նվիրված է Փրկչի մկրտության հիշողությանը: 

«Սա պարզապես սովորույթ չէ, այլ հոգևոր վիճակ է՝ մեղքերից ազատվելու ու Սուրբ ջրով հոգին ու մարմինը բժշկելու, բայց միայն ու միայն հավատքով: Ջուրը սառը չէ, այլ մեզ համար տաք է, քանի որ ջերմացված է մեր Աստծո շնորհիվ»,-նշեց հոգևոր առաջնորդը՝ հավելելով որ այս կարգը միայն ռուս ուղղափառ եկեղեցին ունի: 

Այս օրերին օրհնվում են նաև լճերի ու գետերի ջրերը` ի հիշատակ Աստծո հայտնության: Ջրում 3 անգամ ընկղմվելով՝ մարդիկ ազատվում են մեղքերից։ Մկրտության լողն անցկացվում է հունվարի 18-ի լույս 19-ի գիշերը հատուկ ավազաններում։

 Օրվա խորհուրդով պայմանավորված՝ ջրի օրհնությունը կատարվում է տոնի նախօրեին եկեղեցիներում, Մկրտության օրը՝ գետերում եւ լճերում։ Բացի Մկրտության լողից, հավատացյալները խմում են Մկրտության ջուրը` հոգևոր ուժ ու առողջություն ստանալու համար, նաև այն ցողելով իրենց տներում՝ մաքրագործում են դրանք:

Արմենուհի Մխոյան