Էրեբունի եւ Շենգավիթ վարչական շրջաններում գործող պիոներպալատները կհիմնանորոգվեն
ԵՐԵՎԱՆ, 18 ՀՈՒՆՎԱՐԻ, ԱՐՄԵՆՊՐԵՍ: Էրեբունի եւ Շենգավիթ վարչական շրջաններում գործող երկու նախկին պիոներպալատները, որոնք վերանվանվել են «Մանկապատանեկան ստեղծագործության կենտրոններ», 2017 թվականին կհիմնանորոգվեն: Այս մասին լրագրողների հետ հանդիպմանը ներկայացնելով Երեւանի քաղաքապետարանի 2016 թվականի հաշվետվությունն ու 2017 թվականի անելիքները՝ ասաց Երևանի քաղաքապետի առաջին տեղակալ Կամո Արեյանը:
Նրա խոսքով` 2017 թվականին կշարունակվեն մայրաքաղաքում բակերի եւ բակային տարածքների վերականգման աշխատանքները: «Մայրաքաղաքում 2013-2016 թվականներին 1600 բակ է բարեկարգվել: 2016 թվականին մայրաքաղաքի վարչական շրջաններում 9 մինի ֆուտբոլի դաշտեր են կառուցել: 2017 թվականին նախատեսվում է կառուցել 5 ֆուտբոլի դաշտ եւս»,-«Արմենպրես»-ի հաղորդմամբ ՝ ասաց քաղաքապետի տեղակալը:
Անդրադառնալով բակերում բնակչության շրջանում մեծ պահանջարկ վայելող մարզասարքերի եւ խաղերի տեղադրման աշխատանքներին, նա ասաց, որ 2016 թվականին մայրաքաղաքի բակերում տեղադրվել են 107 խաղ եւ 315 մարզասարք: «Ծրագիրը շարունակական է լինելու նաեւ 2017 թվականի»,-հավելեց Կամո Արեյանը:
Բաժանորդագրվեք մեր ալիքին Telegram-ում