Վրաստանի իշխող կուսակցությանը պաշտպանում Է բնակչության 40 տոկոսը. NDI
13:37, 18 Հունվար 2017
ԵՐԵՎԱՆ, 18 ՀՈՒՆՎԱՐԻ, ԱՐՄԵՆՊՐԵՍ: «Վրացական երազանք» կառավարող կուսակցությանը պաշտպանում Է Վրաստանի բնակչության 40 տոկոսը: Ինչպես տեղեկացնում Է «Արմենպրես»-ը, այդ են վկայում հունվարի 18-ին լրագրողներին ներկայացված սոցիոլոգիական հարցման տվյալները, որն անցկացվել Է ԱՄՆ-ի Ազգային ժողովրդավարական ինստիտուտի (NDI) կողմից:
Պատասխանելով այն հարցին, թե «կուսակցություններից որն Է ձեզ ամենից մոտ իր հայացքներով», քաղաքացիների 40 տոկոսը նշել Է «Վրացական երազանքը», 10 տոկոսը՝ նախկին նախագահ Միխեիլ Սահակաշվիլիի «Միասնական ազգային շարժում» կուսակցությունը, 3 տոկոսը՝ խորհրդարան անցած «Հայրենասերների դաշինք» կուսակցությունը, 3 տոկոսը՝ «Ազատ դեմոկրատներ» կուսակցությունը, իսկ 22 տոկոսը դեմ Է արտահայտվել բոլորին:
Հարցման արդյունքների համաձայն, քաղաքացիների 42 տոկոսն այն կարծիքին Է, որ խորհրդարանի նոր կազմը նախկինից ավելի լավ Է աշխատելու այն դեպքում, երբ 30 տոկոսն օրենսդիր մարմնի աշխատանքում որեւիցե փոփոխություն չի սպասում:
Խորհրդարանի նոր կազմը ձեւավորվել Է խորհրդարանական ընտրությունների արդյունքներով, որոնք կայացել են 2016 թվականի հոկտեմբերին: Օրենսդիր մարմնում տեղ են գտել «Վրացական երազանք» իշխող կուսակցությունը, որը 115 պատգամավորական տեղ Է ստացել 150-ից, իսկ մնացած տեղերը բաժանել են «Միասնական ազգային շարժումը» եւ «Հայրենասերների դաշինքը», որոնք հաղթահարել են 5-տոկոսանոց արգելքն ընտրություններում:
Սոցիոլոգիական հետազոտությունն անցկացվել Է 2016 թվականի նոյեմբերի 4-ից մինչեւ դեկտեմբերի 4-ը: Հարցմանը մասնակցել Է ավելի քան 3 հազար մարդ:
Բաժանորդագրվեք մեր ալիքին Telegram-ում