Թուրքիայի քրդամետ կուսակցության 2 առաջնորդներին սպառնում է 142 և 83 տարվա ազատազրկում
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Թուրքիայի քրդամետ Ժողովուրդների դեմոկրատական կուսակցության ձերբակալված համանախագահներ Սելահաթթին Դեմիրթաշի Ֆիգեն Յուքսեքդաղի վերաբերյալ մեղադրող կողմը մեղադրական եզրակացություններ է պատրաստել:
Այս մասին, ինչպես հաղորդում է «Արմենպրես»-ը, հայտնում է թուրքական demokrathaber.org-ը:
Մեղադրական եզրակացության համաձայն` մեղադրող կողմը Սելահաթթին Դեմիրթաշի համար պահանջում է 142, իսկ Ֆիգեն Յուքսեքդաղի համար` 83 տարվա ազատազրկում:
Մեղադրական եզրակացության մեջ Սելահաթթին Դեմիրթաշը և Ֆիգեն Յուքսեքդաղը մեղադրվում են պաշտոնական Անկարայի կողմից ահաբեկչական հռչակված Քրդստանի բանվորական կուսակցության հետ համագործակցության, ահաբեկչության քարոզ կատարելու, ահաբեկչական կազմակերպության ղեկավար լինելու, հավաքների և ցույցերի վերաբերյալ պետական օրենքները անտեսելու, բնակչության մեջ հրապարակավ ատելություն և թշնամանք հրահրելու, պետական օրենքներին չենթարկվելու, հանցագործության դրդելու հատկանիշներով, և մեղադրող կողմը Դեմիրթաշի համար դատարանից պահանջել է 43-142 տարվա, իսկ Յուքսեսքդաղի համար 30-83 տարվա ազատազրկում:
Հունվարի 16-ին Թուրքիայի քրդամետ Ժողովուրդների դեմոկրատական կուսակցության մեկ այլ անդամի` Շըրնաքին ընտրված պատգամավոր Նուրսել Այդողանի դեմ մինչև 103 տարվա ազատազրկման պահանջով դատական գործ էր հարուցվել:
Թուրքիայում նոյեմբերի 4-ին ձերբակալվել, ապա կալանավորվել են Ժողովուրդների դեմոկրատական կուսակցության 10 պատգամավոր, այդ թվում և համանախագահներ Սելահաթթին Դեմիրթաշը և Ֆիգեն Յուքսեքդաղը:
Ժողովուրդների դեմոկրատական կուսակցության անդամ 59 պատգամավորից 12-ը կալանավորված են:
Բաժանորդագրվեք մեր ալիքին Telegram-ում