ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Նախորդ տարվա ընթացքում Հայաստանի ազգային պատկերասրահը և 12 մասնաճյուղերը ունեցել են շուրջ 80 հազար այցելու: «Արմենպրես»-ի հաղորդմամբ` հունվարի 17-ին լրագրողների հետ հանդիպման ժամանակ ամփոփելով 2016 թվականի գործունեությունը՝ այս մասին ասաց պատկերասրահի գիտքարտուղար Արմինե Գաբրիելյանը:

«55 հազար այցելու հաճախել է Ազգային պատկերասրահ, իսկ մասնաճյուղեր` 25 հազար մարդ: Տարվա ընթացքում պատկերասրահի կրթական ծրագրերին մասնակցել է 158 խումբ՝ շուրջ 2000 մասնակիցներով, իրականացվել է 12 նոր կրթական ծրագիր »,- ասաց Գաբրիելյանը:

Նրա խոսքով` ներկայումս  ազգային պատկերասրահի ֆոնդում պահվում է 39 հազար 771 թանգարանային առարկա:

«Թանգարանային հավաքածուները հիմնականում համալրվում են նվիրատվությամբ: 2016 թվականին թանգարանին նվիրաբերվել է 94 առարկա»,- նշեց Գաբրիելյանը: