Արման Ծատուրյանը մտահոգիչ է համարում Հայաստանի ազգային պատկերասրահի ջեռուցման խնդիրը
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Հայաստանի ազգային պատկերասրահի ջեռուցման խնդիրը խիստ մտահոգիչ է: «Արմենպրես»-ի հաղորդմամբ` հունվարի 17-ին լրագրողների հետ հանդիպման ժամանակ այս մասին ասաց Հայաստանի ազգային պատկերասրահի տնօրեն Արման Ծատուրյանը:
«Հայաստանի ազգային պատկերասրահում ջերմության պահպանման խնդիրը եղել է և ներկայումս առկա է: Այս կառույցը բացարձակապես չի համապատասխանում ժամանակի մարտահրավերներին: Կաթսայատունը օր ու գիշեր աշխատում է, սակայն ջերմությունը մնում է ցածր»,- ասաց Ծատուրյանը:
Նրա խոսքով` անհապաղ միջոցներ է պետք ձեռնարկել, որպեսզի այս խնդրին շուտափույթ լուծում տրվի:
«Մեզ նոր ազգային պատկերասրահ է պետք: Եթե նույնիսկ հնարավորություն չկա նոր շենք կառուցելու, միանշանակ պետք է ջերմության պահպանման համար սկսել ինչ-որ աշխատանքներ կատարել»,- ընդգծեց Ծատուրյանը:
Ծատուրյանը նաև նշեց, որ 9-հոգիանոց ռեստավրացիայի բաժինը ահռելի աշխատանք է տանում վնասված կտավների վերականգնման համար:
Բաժանորդագրվեք մեր ալիքին Telegram-ում