Կառավարությունում օպտիմալացման գործընթացը պետք է շարունակություն ունենա և հասնի իր տրամաբանական ավարտին. տնտեսագետ
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: Կառավարությունում օպտիմալացման գործընթացը պետք է շարունակություն ունենա և հասնի իր տրամաբանական ավարտին: «Արմենպրես»-ի մամուլի սրահում հրավիրված ասուլիսում այս մասին նշեց «Այլընտրանք» հետազոտական կենտրոնի ղեկավար տնտեսագիտության դոկտոր, պրոֆեսոր Թաթուլ Մանասերյանը:
«Եթե վերին օղակներում կան մարդիկ, ովքեր հանրության վրա դրական տպավորություն են գործում, ապա դրանից ներքև բավական լուրջ խնդիրներ կան կադրային քաղաքականությունում: Քիչ չեն դեպքերը, երբ հռչակված նպատակները ժամանակին չեն իրականացվել, որովհետև միջին օղակներում կան մարդիկ, ովքեր կարող են չեզոքացնել այդ դրական միտումները»,-ասաց Թաթուլ Մանասերյանը` ընդգծելով, որ պետական ապարատում կան իրենց աշխատավարձը չվաստակող չինովնիկներ: Այսինքն` նրանցից շատերն իրենց տեղերում չեն:
Ըստ տնտեսագետի` կան մեկ, երկու նախարարություններ, որոնց գործառույթները կրկնվում են: Հետևաբար, այս գործընթացը, ոչ ավելորդ շտապողականությամբ, պետք է ունենա իր հանգուցալուծումը` առանց վնասելու մարդկանց, ովքեր արհեստավարժ են, ունեն ՕԳ բարձր գործակից: Դա կլուծի կառավարման արդյունավետության համակարգի խնդիրը:
«Ակնհայտ իրողություն է, որքան բարձր է կառավարման արդյունավետությունը, այնքան տնտեսությունը դրանից շահում է, հետևաբար կարևորգույն խնդիր եմ համարում կադրային քաղաքականության հարցը: Մրցույթները ոչ թե ձևական բնույթ պետք է կրեն, այլ առարկայական: Կադրային հարցերը վերաբերում են նախարարություններին, գործակալություններին, վարչություններին: Մի շարք նման կառույցների գործառույթներ կրկնվում են»,-ասաց տնտեսագետը:
Թաթուլ Մանասերյանը նշեց, որ իր կողմից այդ բարձրացրած հարցերի հետ կապված պատրաստվում է անձամբ առաջարկություններ ներկայացնել կառավարությանը:
Բաժանորդագրվեք մեր ալիքին Telegram-ում