ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ:  Տոնական օրերին Հայաստանի մաքսային համակարգն աշխատել է արտակարգ ռեժիմով: Մաքսային ծառայության առանձին ստորաբաժանումներում, հսկողության գոտիներում եւ պահեստներում 2016 թվականի դեկտեմբերի 31-ից մինչեւ 2017 թվականի հունվարի 8-ը հերթապահություն է իրականացվել: «Արմենպրես»-ի հաղորդմամբ, լրագրողների հետ զրույցում ԿԱ  ՊԵԿ մաքսային վիճակագրության, վերլուծության եւ ռիսկերի կառավարման վարչության պետ Կարեն Բեգլարյանը նշեց, որ հիշյալ օրերին մաքսային մարմինների կողմից երրորդ երկրներից ընդունվել են ներմուծման` 56 բեռնային եւ 1564 ուղեւորային հայտարարագրեր: «Համապատասխանաբար, հայտարարագրվել են 887.7 միլիոն եւ 187.8 միլիոն դրամ մաքսային արժեքով ապրանքներ եւ տրանսպորտային միջոցներ, գանձվել է 211.7 միլիոն դրամի չափով մաքսային վճար»,-ասաց նա:

Բեգլարյանի խոսքով` ԵԱՏՄ անդամ երկրներից ընդունվել է ներմուծման 355 եւ լրացվել 62 հայտարարագիր:

Մաքսային մարմիններում այդ օրերին հայտարարագրվել են 114.5 տոննա սննդամթերք, 72 տոննա միրգ եւ բանջարեղեն, 296.5 տոննա ցորեն եւ այլն: