ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: ՀՀ Ազգային ժողովի նախագահ Գալուստ Սահակյանը շնորհավորական ուղերձ է հղել Հայաստանի ժողովրդական արտիստ Ռուբեն Մաթեւոսյանին ծննդյան օրվա կապակցությամբ: Այս մասին «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից:

ԱԺ նախագահի ուղերձում ասվում է.

«Ավելի քան կես դար Ձեր անմոռաց կատարումների շնորհիվ հայ երգը շարունակում է դյութել ունկնդրին, իսկ նրանք, ովքեր Ձեր անզուգական ձայնի միջոցով արտերկրում առաջին անգամ են շփվել մեր ժողովրդական ու գուսանական, ժամանակակից հայ կոմպոզիտորների երգերի հետ, սիրահարվել են թե հայ երգարվեստին, թե հայ մշակույթին ընդհանրապես:

Ձեր գործունեությունն անկեղծ նվիրում է հայ երաժշտարվեստին, որին անմնացորդ ծառայում եք նախ որպես Արամ Մերանգուլյանի անվան ժողովրդական գործիքների անսամբլի մենակատար, այժմ էլ՝ որպես նույն անսամբլի գեղարվեստական ղեկավար՝ Ձեր հարուստ փորձն ու գիտելիքները փոխանցելով Ձեր գործը շարունակողներին»:

Ազգային ժողովի նախագահը հոբելյարին մաղթել է առողջություն, ստեղծագործական անսպառ եռանդ եւ նոր հաջողություններ: