Քաղաքագետը կարեւոր է համարում Մինսկի խմբի շեշտադրումները սահմանագծում վստահության մեխանիզմների ներդրման մասին
ԵՐԵՎԱՆ, 11 ՀՈՒՆՎԱՐԻ, ԱՐՄԵՆՊՐԵՍ: Քաղաքագետ Սերգեյ Մինասյանը կարեւոր է համարում Մինսկի խմբի հայտարարության մեջ տեղ գտած այն շեշտադրումները, որոնք հատկապես առնչվում են Վիեննայում եւ Սանկտ Պետերբուրգում ձեռք բերված համաձայնությունների իրականացմանը, ինչպես նաեւ սահմանագծում վստահության մեխանիզմների ներդրմանը: Նրա դիտարկմամբ՝ հայտարարության այս հատվածն ուղղված է Ադրբեջանին:
«Լիովին համաձայն եմ ՀՀ արտգործնախարարության գնահատականի հետ, քանի որ այս հարցում Հայաստանի եւ Մինսկի խմբի դիրքորոշումները համընկնում են: Ըստ իս՝ հայտարարության միայն առաջին երկու հատվածները փաստացի հակասում են իրար: Հասկանալի է, որ փորձ էր արվել հավասարության նշան դնել հայկական եւ ադրբեջանական կողմերի գործողությունների միջեւ: Չնայած չեմ կարծում, որ համանախագահների համար իրականում գաղտնիք է, թե ով էր նախաձեռնել այդ գործողությունները: Մյուս կողմից՝ հայտարարության երկրորդ մասը, կապված ադրբեջանցի դիվերսանտի հետ, պետք է գնահատենք այն համատեքստում, թե եթե ասենք Ադրբեջանը չէր սկսել, ինչո՞ւ է դիվերսանտի դին հայտնվել հայկական տարածքում»,-«Արմենպրես»-ի հաղորդմամբ՝ ընդգծեց քաղաքագետը:
ՀՀ Տավուշի մարզի՝ Չինարի գյուղից դեպի հարավ-արևելք ընկած պետական սահմանի հատվածում դեկտեմբերի 29-ի վաղ առավոտյան ադրբեջանական զորքերը ձեռնարկել էին դիվերսիոն ներթափանցման փորձ: ՀՀ զինված ուժերի ստորաբաժանումները չեզոքացրել էին ադրբեջանական զորքերի նախահարձակ գործողությունները, հակառակորդը ետ էր շպրտվել՝ տալով զոհեր ու վիրավորներ, այդ թվում նաև` մեր մարտական դիրքերի հատվածում: Հայկական կողմից զոհվել է երեք զինծառայող: Դիվերսիոն անհաջող փորձից 12 օր հետո Մինսկի խմբի համանախագահները հայտարարություն են տարածել` նշելով, թե Բաքուն և Երևանը շարունակում են մեղադրել միմյանց 2016 թվականի դեկտեմբերի 29-ին հայ-ադրբեջանական սահմանին տեղի ունեցած ներխուժման փորձի առնչությամբ, ինչի հետևանքով գրանցվեցին մահվան դեպքեր:
Բաժանորդագրվեք մեր ալիքին Telegram-ում