Հրանուշ Հակոբյանը սիրիահայերի մասնակցությամբ ցուցահանդես-տոնավաճառից մատանի է գնել
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ սփյուռքի նախարար Հրանուշ Հակոբյանը արծաթե մատանի գնեց ՀՀ Կառավարության նիստերի մեծ դահլիճի նախասրահում կազմակերպված «Սիրիահայ մշակույթի շունչը Երեւանում» բարեգործական ցուցահանդես-տոնավաճառից: «Արմենպրես»-ի հաղորդմամբ՝ նախարարը լրագրողների հետ ճեպազրույցում ուրախութամբ նշեց սիրիահայերի ստեղծագործելու ոգեւորության մասին:
«Այն, ինչ գնեցի այս տոնավաճառից, բոլորովին այլ որակի մատանի էր: Նման բան անցնող 10-12 ցուցահանդեսների ընթացքում չի եղել թե որակի, եւ թե տեսքի առումով»,-ասաց նա՝ հավելելով, որ սիրիահայ կանանց կողմից պատրաստված հրուշակեղենը կարող է զարդարել յուրաքանչյուրի ամանորյա սեղանը:
ՀՀ սփյուռքի նախարարության Մերձավոր եւ միջին արեւելքի հայ համայնքների վարչության պետ Լեւոն Անտոնյանն էլ «Արմենպրես»-ի հետ զրույցում ասաց, որ նման ցուցահանդեսներ Սփյուռքի նախարարության եւ սիրիայերի հիմնախնդիրները համակարգող կենտրոնի հետ համատեղ կազմակերպվում է 16-րդ անգամ: «Ցուցահանդես-տոնավաճառին սիրիահայերը ներկայացրել են ձեռագործ աշխատանքներ, արծաթյա զարդեր, համեմունքներ, հրուշակեղեն: Այս ցուցահանդեսներից բավական գոհ են մնում սիրիահայերը: Սա բարի ավանդույթ, որը լինելու է շարունակական»,-ասաց Անտոնյանը:
Բաժանորդագրվեք մեր ալիքին Telegram-ում