Էդվարդ Նալբանդյանը ՌԴ խորհրդարանականներին է ներկայացրել սիրիահայությանն աջակցության Հայաստանի ջանքերը
ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի արտգործնախարար Էդվարդ Նալբանդյանը նոյեմբերի 18-ին ընդունել է Ռուսաստանի Դաշնության Դաշնային խորհրդի միջազգային հարցերի հանձնաժողովի նախագահ Կոնստանտին Կոսաչևի գլխավորած ներկայացուցչական խորհրդարանական պատվիրակությանը:
Հանդիպմանն անդրադարձ է արվել երկու ժողովուրդների դարավոր բարեկամության վրա հիմնված հայ-ռուսաստանյան դաշնակցային ռազմավարական հարաբերություններին, Հայաստանի և Ռուսաստանի բարձրագույն ղեկավարության միջև ձեռք բերված պայմանավորվածությունների կատարման ընթացքին։
Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից, Հայաստանի արտգործնախարարը ռուսաստանյան խորհրդարանականների հետ հանգամանալից քննարկել է երկու խորհրդարանների միջև սերտ համագործակցության լայն շրջանակի հարցեր, մտքեր են փոխանակվել միջազգային կազմակերպությունների խորհրդարանական ձևաչափերում փոխգործակցության շուրջ:
Անդրադարձ է կատարվել Մերձավոր Արևելքում և հատկապես՝ Սիրիայում տիրող իրավիճակին, ճգնաժամից դուրս գալու հնարավոր ուղիներին: Հատուկ ուշադրություն է դարձվել Սիրիայի հայությանը, նրանց աջակցելուն ուղղված Հայաստանի ջանքերին:
Նախարար Նալբանդյանը ներկայացրել է Արցախի դեմ Ադրբեջանի կողմից ապրիլին սանձազերծված լայնածավալ ագրեսիայի հետևանքով ստեղծված իրավիճակը և շեշտեց Վիեննայի և Սանկտ Պետերբուրգի գագաթաժողովներին ձեռք բերված համաձայնությունների իրականացման անհրաժեշտությունը:
Հյուրերի խնդրանքով Էդվարդ Նալբանդյանը ներկայացրել է Հայաստան-Սփյուռք համագործակցությունը:
Էդվարդ Նալբանդյանն անդրադարձավ Հայաստանի արտաքին քաղաքականության առաջնահերթություններին, պատասխանեց հյուրերի բազմաթիվ հարցերի:
Բաժանորդագրվեք մեր ալիքին Telegram-ում