ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ: ՀՀ ֆինանսների նախարարությունը հերքում է շրջանառվող տեղեկությունն այն մասին, թե նախարարությունում կադրային ջարդ է: Ինչպես «Արմենպրես»-ի հարցմանն արձագանքելով նշեց նախարարի մամուլի քարտուղար Լուսինե Մկրտչյանը, «նախարարությունում իսկական կոտորած է» ձեւակերպումը տեղին չէ և հեռու է իրականությունից:

«Նախարարի նախկին տեղակալ Արմեն Գևորգյանը ներկայումս զբաղեցնում է ՀՀ ֆինանսների նախարարի խորհրդականի պաշտոնը: Միաժամանակ, ՀՀ ֆինանսների նախարարի տեղակալներ են նշանակվել գերատեսչությունում երկար տարիներ պատասխանատու պաշտոններ զբաղեցրած անձինք: Մասնավորապես՝ նախարարի առաջին տեղակալ է նշանակվել Հանրապետության գլխավոր գանձապետ-նախարարի տեղակալ Ատոմ Ջանջուղազյանը, իսկ մյուս երկու նորանշանակ տեղակալները Կարեն Թամազյանն ու Արմեն Հայրապետյանը, համապատասխանաբար, զբաղեցրել են ՀՀ ֆինանսների նախարարության աշխատակազմի ղեկավարի տեղակալի և նախարարության աշխատակազմի մակրոտնտեսական քաղաքականության վարչության պետի պաշտոնները: Հետևաբար, «կոտորած» ձեւակերպումը տեղին չէ և հեռու է իրականությունից»,-նշում է Մկրտչյանը: