Քաղաքացիական անձանց թիրախավորելը Ադրբեջանի ոճն է. Դավիթ Բաբայան
ԵՐԵՎԱՆ, 4 ՆՈՅԵՄԲԵՐԻ, ԱՐՄԵՆՊՐԵՍ: ԼՂՀ նախագահի մամուլի խոսնակ Դավիթ Բաբայանը «Արմենպրես»-ի հետ զրույցում հերքեց ադրբեջանական ԱՊԱ գործակալության տարածած տեղեկատվությունը, որի համաձայն հայկական զինուժն իբր կրակահերթեր է արձակում Թափկարակոյունլու գյուղի հովիվների ուղղությամբ:
«Դա չի համապատասխանում իրականությանը, որովհետեւ մենք երբեւիցե չենք թիրախավորում քաղաքացիական անձանց եւ քաղաքացիական օբյեկտներ: Դա Ադրբեջանի նման ահաբեկիչ, հանցագործ երկրի ոճն է»,- ընդգծեց Բաբայանը` օրինակ բերելով ապրիլյան քառօրյա պատերազմում ադրբեջանցիների կողմից կատարված վայրագությունները Մարտակերտում, Թալիշում, Մատաղիսում:
«Կարծես թե Ադրբեջանում այդ հակահայկական պրոպագանդան բավականին բարդ խոչընդոտների է առերեսվում: Այդ իսկ պատճառով էլ նրանք նման սարսափելի եւ սուտ տեղեկություններ են հաղորդում»,- հավելեց ԼՂՀ նախագահի մամուլի խոսնակը:
Ադրբեջանական ԱՊԱ լրատվական գործակալությունն ավելի վաղ տեղեկատվություն էր տարածել, թե իբր հայկական զինված ուժերը կրակաերթեր են արձակում Թափկարակոյունլու գյուղի խաղաղ բնակչության եւ հատկապես հովիվների ուղղությամբ: Գործակալությունը գրում է, թե կրակահերթի արդյունքում սատկել է մեկ կով:
Բաժանորդագրվեք մեր ալիքին Telegram-ում