Յագլանդը մտահոգված է Թուրքիայում լրատվամիջոցների դեմ բռնաճնշումների փաստով
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Եվրոպայի խորհրդի գլխավոր քարտուղար Թյորբյորն Յագլանդը խիստ մտահոգիչ է համարել Թուրքիայում «Ջումհուրիեթ» պարբերականի և դրա աշխատողների դեմ իրականացվող գործողությունները: Ինչպես հաղորդում է «Արմենպրես»-ը, այս մասին տեղեկացնում է գերմանական Deutsche Welle պարբերականը:
Նա ընդգծել է, որ «Ջումհուրիեթ»-ի դեմ կատարվածը խիստ հարցականի տակ է առնում այն փաստը, թե որքանով են թուրքական իշխանությունների գործողությունները համաչափ:
Յագլանդը նախազգուշացրել է, որ Թուրքիայում արտակարգ դրության պայմաններում ծայրահեղականություններից չխուսափելու պարագայում հնարավոր է, որ ՄԻԵԴ-ում պաշտոնական Անկարայի դեմ մեծ թվով բողոք ներկայացվի: Նա մտահոգիչ է անվանել երկրում քրդական 15 լրատվամիջոցի փակումը:
Հիշեցնելով, որ անգամ արտակարգ դրության պարագայում Մարդու իրավունքների եվրոպական համաձայնագիրը պարտադիր է Թուրքիայի համար` Յագլանդն ընդգծել է, որ ժողովրդավարական հասարակության համար խոսքի ազատությունն ամենակարևոր հիմնաքարերից է:
Հոկտեմբերի 31-ին թուրքական իրավապահ մարմինները գործողություն են իրականացրել «Ջումհուրիեթ»-ի աշխատակիցների նկատմամբ` խուզարկելով նրանց տներն ու առգրավելով համակարգիչները: Ձերբակալվել է 11մարդ, այդ թվում և պարբերականի գլխավոր խմբագիր Մուրադ Սաբունջուն: Եվս չորս աշխատակցի ձերբակալելու որոշում է ընդունվել: «Ջումհուրիեթ»-ի ղեկավարությանն ու լրագրողներին 5 օր փաստաբանների հետ տեսակցելու արգելք է նշանակվել:
Ձերբակալման որոշումն ընդունած դատարանի որոշման մեջ նշվում է, թե պարբերականն ու դրա աշխատակիցները Քրդական բանվորական կուսակցության (PKK) և գյուլենականների օգտին քարոզչություն են իրականացրել:
Բաժանորդագրվեք մեր ալիքին Telegram-ում