«Գարուն» ամսագիրը բաց է գրականության ոլորտի ստեղծագործողների համար
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: «Գարուն» ամսագիրը բաց է գրականության ոլորտի ստեղծագործողների համար: Այս մասին «Արմենպրես»-ի մամուլի սրահում հրավիրված ասուլիսում նշեց «Գարուն» ամսագրի գլխավոր խմբագիր, բանաստեղծ Աշոտ Գաբրիելյանը:
««Գարուն» ամսագրի խմբագրությունն այս ընթացքում բազմաթիվ ստեղծագործություններ է ստացել: Այսինքն`ակտիվության պակաս չէր զգացվում: Ասեմ, որ այդ ստեղծագործությունների հեղինակների շարքում կան նոր անուններ: Ստեղծագործողներ, որոնց ես ինքս էլ չէի ճանաչում, բայց նրանց աշխատանքները տեղ են գտել ամսագրում: Ցանկացած ոք կարող է նյութ ուղարկել, եթե այն պիտանի է, ապա մենք տեղադրում ենք»,-ասաց Աշոտ Գաբրիելյանը:
Ամսագրի խմբագիրը նշեց, որ փորձելու են զարգացնել գրաքննադատության ուղղությունը:
«Այստեղ խնդիր ունենք, բանավեճի կուլտուրան մեզնում չկա, շատ հաճախ այդ բանավեճերը դուրս են գալիս գրականության հարթակից: Փորձելու ենք այդ մշակույթը բերել` վերահսկելով, որ գրականության համար պիտանի քննադատական նյութեր լինեն: Ի վերջո, քննադատությունը նպաստում է գրականության զարգացմանը»,-ավելացրեց Աշոտ Գաբրիելյանը:
Նա կարևորեց Սփյուռքի հետ աշխատանքը: Սփյուռքի գրողների մտահոգությունները, քննադատությունը նույնպես տեղ են գտնելու ամսագրում: Խմբագիրն ընդգծեց, որ «Գարուն»-ն ինչպես համարձակ եղել է, այդպես էլ մնալու է:
«Գարուն» ամսագիրն ակտիվ է լինելու նաև էլեկտրոնային տիրույթում: Այն առկա է ֆեյսբուք սոցիալական ցանցում: Ներկայում էլ ընթանում են «Գարուն» ամսագրի կայքի ստեղծման աշխատանքները:
Բաժանորդագրվեք մեր ալիքին Telegram-ում