«Գյումրին 2016-ի երիտասարդական մայրաքաղաք» ծրագրի շրջանակներում իրականացվելու է «Գունավորենք մեր քաղաքը» ծրագիրը
ԳՅՈՒՄՐԻ, 28 ՀՈԿՏԵՄԲԵՐԻ, ԱՐՄԵՆՊՐԵՍ: «Գյումրին 2016-ի երիտասարդական մայրաքաղաք» ծրագրի շրջանակներում իրականացվելու է «Գունավորենք մեր քաղաքը» ծրագիրը, որին մասնակցելու են երիտասարդ նկարիչներ ինչպես Շիրակից, այնպես էլ ՀՀ այլ մարզերից: Ծրագրի շրջանակներում նախատեսվում է երիտասարդների ջանքերով ունենալ սթրիտ արտ ոճի նկարներ Գյումրու տարբեր հատվածներում: Ծրագրի մեկնարկն ազդարարվեց հոկտեմբերի 28-ին, այն կավարտվի նոյեմբերի 1-ին: Այս մասին հոկտեմբերի 28-ին կայացած ասուլիսի ժամանակ տեղեկացրին ծրագրի պատասխանատուները՝ նշելով, որ նախաձեռնության նպատակն է արհեստների և արվեստների քաղաքը լցնել նոր շնչով և թարմ գույներով՝ ներգրավելով տեղի, ինչպես նաև հանրապետության այլ մարզերի երիտասարդ նկարիչներին: «Այս ընթացքում Շիրակի մարզի և հանրապետության այլ վայրերից ժամանած երիտասարդ 25 նկարիչներ միասին կաշխատեն քաղաքի 10 վայրերում՝ փորձելով «գունավորել» ողջ Գյումրին»,-նշեց «Ծիրանափող» մշակութային երիտասարդական ՀԿ-ի հասարակության հետ կապերի պատասխանատու Գայանե Ավետիսյանը:
Նկարիչների ընտրությունը կատարվել է նախապես ներկայացված նկարների գնահատման արդյունքում, իսկ վայրերը և համապատասխան նկարները՝ Գյումրու քաղաքապետարանի համապատասխան բաժնի թույլտվությամբ: Ծրագրի ղեկավար Էդգար Դարբինյանը հավելեց, որ նկարվելու են հայտնի հայ նկարիչների գործերից՝ Սարյան, Մինաս Ավետիսյան, Կոջոյան, Բաշինջաղյան և այլն, իսկ վերջում բոլորի նկարիչների մասնակցությամբ կնկարվի 1 ընդհանուր նկար: «Կփորձենք ամեն ինչ անել, որ քաղաքի դիմագիծը չկորցնենք, ավելի պայծառ գույներով ողողենք մեր քաղաքը»,-նշեց Էդգար Դարբինյանը՝ հատուկ շնորհակալություն հայտնելով տարբեր մարզերից ժամանած նկարիչներին՝ 5 օր Գյումրիում մնալու ու Գյումրին զարդարելու համար:
Ծրագիրն իրականացվում է «Ծիրանափող» մշակութային երիտասարդական ՀԿ-ի կողմից՝ ՀՀ Սպորտի և երիտասարդության հարցերի նախարարության և Գյումրու քաղաքապետարանի աջակցությամբ:
Արմենուհի Մխոյան
Բաժանորդագրվեք մեր ալիքին Telegram-ում