Հայ ոսկերիչներն աշխարհի լավագույն մասնագետներից են. Գագիկ Գեւորգյան
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանը ստեղծում է ոսկերչական արդյունաբերության համար բարենպաստ պայմաններ: «Արմենպրես»-ի հաղորդմամբ՝ այս մասին «Մերիդիան» ոսկերչական գոտու տարածքում շուրջ 25 երկրներից ժամանած պատվիրակությունների մասնակցությամբ մեկնարկած Ոսկեգործների համաշխարհային համադաշնության` CIBJO-ի հերթական համագումարին ասաց Համաշխարհային հայ ոսկերիչների միության նախագահ Գագիկ Գեւորգյանը:
«Ամեն տարի համաժողովն անցկացվում է տարբեր երկրներում: Այս տարի մեր հրավերով կանցկացվի Երեւանում, որտեղ մեկ շաբաթվա ընթացքում քննարկվելու են ինդուստրիայի հետ կապված բոլոր խնդիրները համաշխարհային մասշտաբով՝ կապված քարերի, ադամանդների, գունավոր թանկարժեք քարերի եւ ոսկերչական ուրիշ խնդիրների հետ: Այսինքն՝ այստեղ քննարկվում են հարցեր, որոնք հետագայում դառնում են օրենքներ ամբողջ աշխարհի երկրների ոսկերչական ինդուստրիայի համար: Կարող եմ ասել, որ հայ ոսկերիչներն աշխարհի լավագույն ոսկերիչներից են, եթե ոչ ամենալավը, սակայն ցավոք, նրանց մեծ մասը դրսում են»,-ասաց միության նախագահը:
Նրա խոսքով՝ նպատակ կա դրսում գտնվող ոսկերիչներին բերել Հայաստան, որպեսզի վերջիններս հիմնեն իրենց բիզնեսն այստեղ:
«Պետք է կարողանանք ճիշտ, լավ մթնոլորտ ստեղծել նրանց համար, եւ այդ բոլոր պայմանները երկրի ղեկավարությունը հիմա ստեղծում է: Ես ուրախ եմ, քանի որ համաժողովն էլ ցույց է տալիս, որ հրավիրելով ամբողջ աշխարհի մեծագույններին այստեղ՝ Հայաստանը դառնում է աշխարհի ոսկերչական կենտրոն: Դա խոսում է այն մասին, որ թե՛ հայ, թե՛ օտարերկրացի ոսկերիչները մեծ վստահությամբ պետք է տրամադրվեն Հայաստանի նկատմամբ: Այս շենքում է գտնվում նաեւ ազատ տնտեսական գոտին, որտեղ տարբեր երկրերի ոսկերիչները կարող են գալ եւ հիմնել իրենց աշխատատեղերը եւ ազատված լինել հարկերից»,-ընդգծեց Գագիկ Գեւորգյանը:
Զարդագործության, ոսկերչության, թանկարժեք մետաղների, ադամանդների, մարգարիտների եւ թանկարժեք քարերի միջազգային համադաշնությունը միջազգային մասնագիտական կազմակերպություն է, որը միավորում է աշխարհի ոսկերչության ողջ ոլորտը` թանկարժեք մետաղների եւ քարերի արդյունահանումից մինչեւ պատրաստի արտադրանքի իրացումը: Այն այս ոլորտը կանոնադրող եւ կանոնակարգող համաշխարհային հիմնական ատյանն է: Համադաշնության անդամ են հանդիսանում ոսկեգործական ազգային ընկերակցություններն աշխարհի շուրջ 40 երկրներից, որոնց թվում է Հայ ոսկերիչների ընկերակցությունը: Կազմակերպության նստավայրը Միլանում է:
Բաժանորդագրվեք մեր ալիքին Telegram-ում