59 մարդ Է զոհվել Պակիստանում ոստիկանական ակադեմիայի վրա կատարված հարձակման հետեւանքով
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Առնվազն 59 մարդ Է զոհվել, եւս 116 հոգի, ներառյալ պահպանության ծառայության աշխատակիցներ, վիրավորվել Պակիստանի Բելուջստանի նահանգի մայրաքաղաք Քվետայի արվարձանում ոստիկանների պատրաստման քոլեջի վրա զինյալների հարձակման հետեւանքով: Այդ մասին, ինչպես տեղեկացնում Է «Արմենպրես»-ը, հոկտեմբերի 25-ին հայտնել Է Geo TV հեռուստաալիքը՝ հղում անելով տուժածներին օգնություն ցուցաբերող բժիշկներից մեկին:
Վիրավորներից ութը օրհասական վիճակում են: Բելուջստանի տարածաշրջանի ներքին գործերի նախարար Սարֆարազ Բուգտին պատմել Է, որ հակաահաբեկչական գործողությունն ավարտված Է, դրա ընթացքում ոչնչացվել են երեք զինյալներ, հաջողվել Է ազատել 250-ից ավելի պատանդների:
Հոկտեմբերի 24-ի երեկոյան հինգ կամ վեց զինյալներ ներխուժել են Քվետայի արվարձանում ոստիկանների պատրաստման քոլեջ եւ անկանոն կրակ բացել: Բուգտիի խոսքով՝ հարձակման պահին ուսումնական հաստատությունում շուրջ յոթ հարյուր սովորողներ են եղել:
Լուսանկարը`Reuters
Բաժանորդագրվեք մեր ալիքին Telegram-ում