ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Իրաքյան «Աս-Սումարիա» հեռուստաընկերության օպերատորը Մոսուլն «Իսլամական պետություն» ահաբեկչական խմբավորումից ազատագրելու կառավարական ուժերի գործողությունների լուսաբանման ժամանակ զոհվել է: Ինչպես հաղորդում է «Արմենպրես»-ը` վկայակոչելով ՏԱՍՍ-ը, այս մասին ասվում է հեռուստաընկերության կայքում:

«Օպերատոր Ալի Ռիսանը մահկանացուն է կնքել Մոսուլի հարավում աշ-Շուրա շրջանի գործողությունները լուսաբանելու ժամանակ: Դիպուկահարի արձակած փամփուշտը դիպել է նրա կրծքին: Ստացած վիրավորումից նա տեղում մահացել է»,- ասվում է հայտարարության մեջ:

Մոսուլն ԻՊ-ից ազատագրելու ցամաքային գործողությունները սկսվեցին հոկտեմբերի 17-ի առավոտյան: Իրաքյան կառավարական ուժերից բացի դրանց մասնակցում են նաև քրդական միավորները, ինչպես նաև միջազգային հակաահաբեկչական կոալիցիան:

Մոսուլն Իրաքի` մեծությամբ երկրորդ քաղաքն է, որն ունի 1.3 մլն բնակչություն: Այն երկու տարուց ավելի գտնվում է ծայրահեղական խմբավորման հսկողության տակ: