ՆԱՏՕ-ն նշանակել է գլխավոր քարտուղարի` հետախուզության եւ անվտանգության հարցերով նոր օգնական
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: ՆԱՏՕ-ի գլխավոր քարտուղար Յանս Ստոլտենբերգը նշանակել է Արնդ Ֆրեյթագ ֆոն Լորինգհովենին` գլխավոր քարտուղարի` հետախուզության եւ անվտանգության հարցերով օգնականի պաշտոնում, ով զբաղվելու է դաշինքի հետախուզական գործունեության համակարգմամբ: «Արմենպրես»-ի հաղորդմամբ` այս մասին տեղեկացրել է The Wall Street Journal-ը:
Ինչպես հաղորդում են խմբագրությունից, սկզբնական փուլում նոր օգնականի աշխատանքի մեծ մասն ուղղված կլինի նաեւ Ռուսաստանի ռազմական ոլորտի հզորացման վերաբերյալ հետախուզական տվյալների փոխանակման բարելավմանը:
Դաշինքի մամուլի ծառայության ներկայացուցիչ Դիլան Ուայթի խոսքով` Արնդ Ֆրեյթագ ֆոն Լորինգհովենի ղեկավարության տակ է գտնվելու ինչպես քաղաքացիական, այնպես էլ ռազմական անձնակազմը:
Արնդ Ֆրեյթագ ֆոն Լորինգհովենն ունի մեծ փորձ դիվանագիտական ոլորտում, ներկայումս նա զբաղեցնում է Չեխիայում Գերմանիայի դեսպանի պաշտոնը:
2007-2010 թվականներին նա եղել է գերմանական հետախուզական ծառայության ղեկավարի տեղակալ:
Բաժանորդագրվեք մեր ալիքին Telegram-ում