Մինսկի խմբի համանախագահները Հայաստանի և Ադրբեջանի նախագահների նոր հանդիպման կազմակերպման նպատակ ունեն
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: ԵԱՀԿ Մինսկի խմբի համանախագահները պատրաստ են շարունակել աշխատանքը ղարաբաղյան հակամարտության կարգավորման ուղղությամբ: Ինչպես հաղորդում է «Արմենպրես»-ը, այս մասին Բաքվում մամուլի ասուլիսի ժամանակ հայտարարել է Մինսկի խմբի ԱՄՆ համանախագահ Ջեյմս Ուորլիքը:
«Վիեննայում և Սանկտ Պետերբուրգում լավ հնարավորություն է ստեղծվել ղարաբաղյան հակամարտության կարգավորման համար: Մենք շարունակում ենք այս ուղղությամբ բանակցությունները Բաքվում և Երևանում»,- նշել է Ուորլիքը:
Համանախագահը հայտնել է, որ Միացյալ Նահանգները, Ռուսաստանն ու Ֆրանսիան ակտիվորեն համագործակցում են հիմնախնդրի կարգավորման ուղղությամբ: «Վերջերս Մոսկվայում մենք հանդիպել էինք Ռուսաստանի ԱԳՆ ղեկավար Սերգեյ Լավրովի հետ: Երեք համանախագահների մոտ նպատակը մեկն է` գտնել հակամարտության խաղաղ կարգավորման ուղիներ»,- ասել է Ուորլիքը:
Նա հիշեցրել է ամիսներ առաջ ԱՄՆ պետքարտուղար Ջոն Քերիի կողմից Հայաստանի ու Ադրբեջանի նախագահների հետ ունեցած հանդիպումները` ընդգծելով, որ ԱՄՆ հանձնառությունը հիմնախնդրի կարգավորման ուղղությամբ չպետք է կասկածի տակ դրվի:
Ուորլիքը հայտնել է նաև, որ հանդիպել է Ադրբեջանի նախագահ Իլհամ Ալիևի հետ, ով ցանկություն է հայտնել հանդիպել ՀՀ Նախագահ Սերժ Սարգսյանի հետ: Նա ընդգծել է, որ տարածաշրջանային այս այցի ժամանակ իրենք կկազմակերպեն նախագահների նոր հանդիպում:
Ադրբեջան այցելած համանախագահներն ավելի ուշ կժամանեն Հայաստան, ապա կլինեն Լեռնային Ղարաբաղում:
Բաժանորդագրվեք մեր ալիքին Telegram-ում