Հունաստանի վարչապետը Էրդողանի հայտարարությունը վտանգավոր է համարել
ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Հունաստանի վարչապետ Ալեքսիս Ցիպրասը անդրադարձել է Թուրքիայի նախագահ Ռեջեփ Թայիփ Էրդողանի՝ Լոզանի պայմանագրի վերաբերյալ կատարած հայտարարություններին:
Այս մասին, ինչպես հաղորդում է «Արմենպրես»-ը, հայտնում է թուրքական demokrathaber.org լրատվականը:
Հունաստանի վարչապետի գրասենյակի տարածած տեղեկության համաձայն` Հունաստանի վարչապետ Ցիպրասը Էրդողանի` Լոզանի պայմանագրի վերաբերյալ կատարած հայտարարությունները գնահատել է «վտանգավոր» երկու երկրների հարաբերությունների հետագա զարգացման համար:
«Հույն- Թուրքական հարաբերությունները, Էգեյան ծովի եւ կղզիների նկատմամբ երկու երկրների կարգավիճակը սահմանող պայմանագիրը կասկածի տակ դնելը երկու երկրների հարաբերությունների եւ տարածաշրջանի համար վտանգավոր է»,-ասել է վարչապետը:
Թուրքիայի նախագահ Ռեջեփ Թայիփ Էրդողանը 2016 թվականի հուլիսի 15-ին տեղի ունեցած հեղաշրջման մասին խոսելիս անդրադարձ էր կատարել պատմական անցյալին` կասկածի տակ դնելով Լոզանի պայմանագիրը:
Լոզանի պայմանագիրը կնքվել է 1923 թվականի հուլիսի 24-ին, որով պաշտոնապես հանգուցալուծվել է Մերձավոր Արեւելքում 1919-1923 թվականներին առկա հակամարտությունը, մասնավորապես` թուրք-հունական պատերազմը:
Բաժանորդագրվեք մեր ալիքին Telegram-ում