Թուրքիայում մտավորականներ են ձերբակալվել
ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Իզմիրի հանրապետական դատախազությունը հոկտեմբերի 1-ի առավոտյան Իզմիրի, Բալըքեսիրի, Մանիսայի եւ Անկարայի նահանգներում գյուլենականների դեմ ուղղված հետախուզական գործողություններ է իրականացրել:
Այս մասին, ինչպես հաղորդում է «Արմենպրես»-ը, հայտնում է թուրքական haberler.com լրատվականը:
Հետախուզական գործողությունների թիրախում ընդհանուր առմամբ եղել է 23 մարդ, որոնցից 11-ը գյուլենականներին հարելու եւ գյուլենականների գաղտնի հաղորդակցման միջոց հանդիսացող ByLock հեռախոսային հավելվածից օգտվելու մեղադրանքով ձերբակալվել են:
Ձերբակալվածները Իզմիրի Էգեյան համալսարանի գիտնականներ են:
«Հիզմեթ Հարեքեթի» ազդեցիկ կրոնական կազմակերպության առաջնորդ Ֆեթուլլահ Գյուլենի շարժումը, որը համարվում է նաեւ նուրսիստների (Նուրչուլար) շարժում, արդի իսլամ քարոզող հզոր շարժում է: Գյուլենական շարժումը քարոզում է իսլամական չափավորություն, հանդուրժողականություն, միջկրոնական երկխոսություն, իսլամի եւ ժողովրդավարության համատեղելիություն:
Պաշտոնական Անկարան Գյուլենին մեղադրում է հուլիսի 15-ին տեղի ունեցած ռազմական հեղաշրջման փորձը կազմակերպելու մեջ, իսկ նրա գլխավորած շարժումը հռչակել է ահաբեկչական:
Բաժանորդագրվեք մեր ալիքին Telegram-ում