Չեխիայի նախագահը կողմ է արտահայտվել ԵՄ-ի հետ Ռուսաստանի վիզային ռեժիմի դյուրացմանը
ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: Չեխիայի նախագահ Միլոշ Զեմանը հայտարարել է, որ վիզային սահմանափակումները խանգարում են Չեխիայի և Ռուսաստանի միջև բնականոն փոխազդեցությանը:
«Դեռեւս նախքան ԵՄ-Ռուսաստան պատժամիջոցային պատերազմի մեկնարկը ես կողմ էի արտահայտվում ռուսների համար վիզային ռեժիմի լիակատար չեղարկմանը»,- «Արմենպրես»-ի հաղորդմամբ` այս մասին Lenta.ru-ի հետ զրույցում նշել է Չեխիայի նախագահը:
Նրա խոսքով` Չեխիայի կողմից ռուս քաղաքացիներին երկարաժամկետ վիզա չտրամադրելը պայմանավորված է անցյալի գործոններով.
«20 տարի առաջ մենք շատ էինք վախենում ռուսական, հիմնականում՝ ուկրաինական մաֆիայից: Այս երկրների վարձու մարդասպանները սպանում էին Չեխիայի ձեռներեցներին: Մենք այն ժամանակ միամտորեն կարծում էինք, որ վիզային ռեժիմ սահմանելը մեզ կազատի այդ խնդիրներից»,- ասել է Զեմանը:
Նախագահը հայտնի է իր ռուսամետ դիրքորոշմամբ: Նա ոչ մեկ անգամ է կողմ արտահայտվել ԵՄ պատժամիջոցների վերացմանը եւ ԵՄ-Ռուսաստան երկխոսության վերահաստատմանը:
Բաժանորդագրվեք մեր ալիքին Telegram-ում