ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: Կառավարությունը հաստատեց ընդհանուր օգտագործման ավտոմոբիլային ճանապարհների վերանորոգված հատվածների ծածկի որակի գնահատման ընթացքում անհարթության միջազգային ցուցիչի (ԱՄՑ) չափանիշի կիրառման մեթոդաբանությանը: ՀՀ տրանսպորտի և կապի նախարար Վահան Մարտիրոսյանը նշեց, որ այն կնպաստի հանրապետության ընդհանուր օգտագործման պետական ավտոմոբիլային ճանապարհների վերանորոգվող հատվածների շինարարական աշխատանքների որակի բարձրացմանը, ինչպես նաև կհստակեցնի վերանորոգված հատվածի ծածկի մերժման և ընդունման չափորոշիչները՝ կախված ԱՄՑ չափանիշից:

Գործադիրը փոփոխություններ և լրացումներ է կատարեց նախկինում ընդունած որոշումներից մեկում՝ ավտոմոբիլային ճանապարհների պահպանման վիճակի բնորոշման (խմբավորման) ցանկում ներառելով նաև վատ ճանապարհները:  Ըստ Մարտիրոսյանի՝ որոշման ընդունումը կկանխի  ճանապարհների էլ ավելի վատթարացումը և հնարավորություն կնձեռնի զարգացնել ճանապարհային ցանցը՝ ապահովելով անխափան երթևեկությունը: 

«Արմենպրես»-ի փոխանցմամբ՝ կառավարությունը փոփոխություն կատարեց նաև ՀՀ ընդհանուր օգտագործման  պետական ավտոմոբիլային ճանապարհների տնտեսական, ռազմավարական, սոցիալական և տարածքների համաչափ զարգացման չափորոշիչների վրա հիմնված ճանապարհների պահպանման և զարգացման առաջնահերթությունների որոշման կարգում՝  հաստատելով բազմաչափանիշային վերլուծության շրջանակի կիրառումը միայն մարզային (տեղական) ճանապարհների պահպանման և զարգացման առաջնահերթությունների որոշման համար, իսկ միջպետական և հանրապետական նշանակության ճանապարհների պահպանման և զարգացման առաջնահերթությունների որոշումը կայացնել ՀԲ-ի և ԱԶԲ-ի կողմից հավանության արժանացած HDM-4 տնտեսագիտական վերլուծությունների համակարգչային ծրագրի արդյունքներից ելնելով: