Օրգանական գյուղատնտեսությունը զարգացման մեծ ներուժ ունի Հայաստանում. Իգնատի Առաքելյան
ԵՐԵՎԱՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Ավստրիայի զարգացման գործակալության եւ Եվրամիության օժանդակությամբ իրականացվող «Օրգանական գյուղատնտեսության աջակցության նախաձեռնություն» ծրագրի շրջանակում ներկայացվեցին դրամաշնորհային մրցույթում հաղթած 18 ծրագրերը: «Արմենպրես»-ի հաղորդմամբ` միջոցառմանը ներկա գյուղատնտեսության նախարար Իգնատի Առաքելյանը նշեց, որ օրգանական գյուղատնտեսության ներդրումը Հայաստանում զարգացման մեծ ներուժ ունի: «Այս ուղղությունը բավական եկամտաբեր է գյուղատնտեսության համար, հետեւաբար շատ եմ կարեւորում սպառողների իրազեկման գործընթացը»,-ասաց նա:
Ավստրիայի զարգացման գործակալության գործադիր տնօրեն Մարտին Լեդոլթերն իր երկրի օրինակով առաջարկեց Հայաստանում սուբսիդիաներ ստեղծել` պահպանելու համար օրգանական գյուղատնտեսության կանոնները:
Ավստրիայի զարգացման գործակալության եւ Եվրամիության օժանդակությամբ իրականացվող «Օրգանական գյուղատնտեսության աջակցության նախաձեռնություն» ծրագիրը միտված է նպաստել, մասնավորապես, փոքր եւ միջին գյուղացիական տնտեսությունների եւ ձեռնարկությունների զարգացմանը՝ դրամաշնորհային ծրագրերի եւ տեխնիկական օժանդակության միջոցով:
Միջոցառման ընթացքում հայտարարվեց նաեւ փոքր ֆերմերների եւ ֆերմերային խմբերի աջակցության ծրագրի մասին: «Փոքր ֆերմերները հանդիսանում են օրգանական գյուղատնտեսության հիմնասյուները, հետեւաբար մեր կողմից տրամադրված օգնությունը շատ եմ կարեւորում»,-հավելեց Հայաստանում ԵՄ պատվիրակության Միջազգային օգնության եւ համագործակցության պատասխանատու Ջոն Բարքերը:
Բաժանորդագրվեք մեր ալիքին Telegram-ում