Գյումրիում ստացվել է հոկտեմբերի 2-ին կայանալիք ընտրությունների քվեաթերթիկի նմուշը
ԳՅՈՒՄՐԻ, 27 ՍԵՊՏԵՄԲԵՐԻ, ԱՐՄԵՆՊՐԵՍ : Գյումրիում ՏԻՄ ընտրությունները համակարգող թիվ 34 ԸԸՀ-ն արդեն ստացել է հոկտեմբերի 2-ին կայանալիք ընտրությունների քվեաթերթիկի նմուշը:
Գյումրիում ՏԻՄ ընտրություններն այս անգամ կանցկացվեն արդեն փոփոխված՝ համամասնական ընտրակարգով: Ընտրողը քվեարկելու է մեկ քվեաթերթիկով՝ իր ձայնը տալով մեկ քաղաքական ուժի՝ կուսակցության կամ դաշինքի« այլ ոչ թե անձի:
Ինչպես «Արմենպրես»-ին տեղեկացրեց թիվ 34 ընտրատարածքի նախագահ Էդվարդ Բաղրամյանը, ընտրատարածքում քվեաթերթիկի նմուշն արդեն առկա է՝ բոլոր 11 քաղաքական ուժերի անվանումներով:
«Քվեաթերթիկում բացակայում են 411 թեկնածուների անունները« փոխարենը քաղաքական 11 ուժերի անուններն են: Ընտրողը քվեարկելու է այն կուսակցության օգտին« որի համամասնական ցուցակում ընդգրկված է իր նախընտրելի թեկնածուն»,-նշեց Էդվարդ Բաղրամյանը:
«Քվեաթերթիկում քաղաքական ուժի անվանման դիմաց նշվում է նաև այդ ուժի համամասնական ցուցակի առաջին երեք համարների անունները« սակայն դա չի ենթադրում« որ քաղաքացիները նշումներ պետք է կատարեն այդ անձանց անունների դիմաց« դրանք ընդամենը քաղաքացիների համար հուշող նշանակություն ունեն»,-հավելեց պատասխանատուն:
Կուսակցության դիմաց նշումից բացի ցանկացած այլ նշում քվեաթերթիկը դարձնում է անվավեր:
Արմենուհի Մխոյան
Բաժանորդագրվեք մեր ալիքին Telegram-ում