Արմեն Երիցյանը ՀՀ Նախագահի պարգևներ է հանձնել ՀՀ ԱԻ նախարարության աշխատակիցներին
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարությունում սեպտեմբերի 26-ին կայացել է հերթական ամենշաբաթյա խորհրդակցությունը, որը վարել է ԱԻ նախարարի պաշտոնակատար Արմեն Երիցյանը:
Խորհրդակցության սկզբում Ա. Երիցյանը շնորհավորել է ՀՀ ԱԻՆ Ճգնաժամային կառավարման պետական ակադեմիայի ռեկտոր Հ. Մաթևոսյանին` ՀՀ Նախագահի կողմից փ/ծ գեներալ-մայորի կոչում ստանալու կապացությամբ և մաղթել հետագա բեղուն աշխատանք: Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Նախարար Ա. Երիցյանը ՀՀ ԱԻՆ ՓԾ տնօրենի տեղակալ, փ/ծ գնդապետ Ա. Ցոլակյանին և Քաղաքացիական պաշտպանության միջոցառումների կազմակերպման վարչության պետ, փ/ծ գնդապետ Մ. Ներսիսյանին հանձնեց ՀՀ Նախագահի հրամանագրով շնորհված Երախտագիտության մեդալները:
ՀՀ Նախագահի մեկ այլ հրամանագրով` ՀՀ ԱԻՆ «Աղետների բժշկության տարածաշրջանային կենտրոն» ՊՈԱԿ-ի տնօրեն, փ/ծ գնդապետ Կ. Աթոյանն արժանացել է Մխիթար Հերացու մեդալի:
ՀՀ ԱԻ նախարարության ընթացիկ աշխատանքների վերաբերյալ հանձնարարականներ ստանալուց հետո ամենշաբաթյա խորհրդակցությանն առցանց մասնակցող ԼՂՀ ԿԱ արտակարգ իրավիճակների պետական ծառայության ներկայացուցիչը և ՀՀ մարզային փրկարարական վարչությունների պետերը զեկուցեցին շաբաթվա ընթացքում գրանցված պատահարների, ձեռնարկված միջոցառումների և մարզային վարչությունների մասնաշենքերում իրականացվող վերանորոգման աշխատանքների մասին»։
Բաժանորդագրվեք մեր ալիքին Telegram-ում