Լեզուների իմացությունը կնպաստի միջմշակութային հաղորդակցման զարգացմանը
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: «Լեզուների եվրոպական օրվա» առթիվ ԵՊԼՀ-ում սեպտեմբերի 26-ին տեղի ունեցավ «ՀՀ առաջնայնությունները լեզվական և լեզվամշակութային կրթության ոլորտում» թեմայով հանդիպում: «Ցանկալի է, որ մեր երկրում հանրությունը մեկից ավելի օտար լեզուների տիրապետի, իրականանա միջմշակութային հաղորդակցում: Մեր նպատակն է նպաստել ազգային փոքրամասնությունների լեզվի պահպանմանը և տարածմանը աշխարհում»,-«Արմենպրես»-ի փոխանցմամբ`նշեց ԵՊԼՀ ռեկտոր Գայանե Գասպարյանը:
Կլոր սեղանի շուրջ հավաքվել էին ինչպես ԵՊԼՀ-ի ներկայացուցիչները, այնպես էլ անձիք ՀՀ ԿԳ նախարարությունից:
«Եթե երեխան սովորում է անգլերեն, ֆրանսերեն կամ իտալերեն, լավ կլինի, որ մյուս օտար լեզուն արևելյան լինի` չինարեն, արաբերեն և այլ: Շատ կարևոր է հայերենի դերը: Միայն մեր երկրում ենք ասում «Բարի լույս», մյուս բոլոր երկրներում` «Բարի առավոտ»: «Լույսը» յուրահատուկ նշանակություն ունի: Այլ մշակույթներ յուրացնելով` պետք է զգույշ լինել և չկորցնել մեր սեփականը»,-ասաց ՀՀ կրթության և գիտության նախարարի տեղակալ Մանուկ Մկրտչյանը:
Գիտության և միջազգային կապերի գծով պրոռեկտոր Լուսինե Ֆլջյանի խոսքով`ՀՀ-ն ակտիվ համագործակցում է «Ժամանակակից լեզուների եվրոպական կենտրոնի» հետ: «Տարբեր մասնագետներ 2001թ-ից մասնակցում են սեմինարների, վերապատրաստումների և այլ ծրագրերի»,- շեշտեց պրոռեկտորը:
Ըստ օտար լեզուների ամբիոնի ներկայացուցիչների` գերմաներենը, ֆրանսերենը և այլ լեզուները տարածելու համար տարվա ընթացքում բազմաթիվ ծրագրեր են մշակվում և իրականացվում, սակայն հաճախ պետության աջակցության կարիք է լինում:
«Մի կողմից ռուսաց լեզվի մասնագետների պահանջարկ կա, մյուս կողմից` չկան մասնագետներ: Կարծում եմ ` անհրաժեշտ է հստակ ռազմավարություն մշակել ռուսաց լեզվի հետ կապված խնդիրները լուծելու համար»,- ընդգծեց բանասեր Նինա Տատկալոն:
«Լեզուների եվրոպական օր» ամենամյա նախագիծն իրականացվում է 2001թ.: Ծրագրի նպատակն է աջակցել լեզվական բազմազանությանը, աշխարհում տարբեր լեզուների դասավանդման զարգացմանը: Այն հիմնվել է Եվրոպայի խորհրդի կողմից: Հայաստանի Հանրապետությունում նախորդ տարիներին լեզուների օրվա առթիվ անցկացվել է 900 միջոցառում: Այս տարի հնարավոր է` դրանց թիվը հասնի 1000-ի:
Բաժանորդագրվեք մեր ալիքին Telegram-ում