«Մենամարտիկը» ֆիլմը Յալթայում կբացի «Եվրասիական կամուրջ» առաջին միջազգային կինոփառատոնը
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Ալեքսեյ Միզգիրյովի «Մենամարտիկը» ֆիլմը սեպտեմբերի 30-ին կբացի «Եվրասիական կամուրջ» առաջին միջազգային կինոփառատոնը, որը Յալթայում անցկացվելու Է Ռուսաստանի կինեմատոգրաֆիստների միության նախագահի՝ ռեժիսոր Նիկիտա Միխալկովի նախաձեռնությամբ: Այդ մասին, ինչպես տեղեկացնում Է «Արմենպրես»-ը, սեպտեմբերի 26-ին հայտնել Է Ղրիմի կառավարության մամուլի ծառայությունը:
«Փառատոնի բացման արարողության շրջանակներում կցուցադրվի «Մենամարտիկը» ֆիլմը, որը կներկայացնի բեմադրող ռեժիսոր Ալեքսեյ Միզգիրյովը»,-ասված Է հաղորդագրության մեջ:
Կառավարության հաղորդագրության մեջ նաեւ նշված Է, որ, ինչպես սպասվում Է, փառատոնի հյուրերն ու մասնակիցները կդառնան Ռուսաստանի, Ուկրաինայի, Բելառուսի, Բելգիայի, Հնդկաստանի, Հայաստանի, Ղազախստանի, Ուզբեկստանի, Ադրբեջանի, Սերբիայի, Հարավային Կորեայի եւ Չինաստանի կինեմատոգրաֆիստները:
«Եվրասիական կամուրջի» ծրագիրը ներառում Է խաղարկային եւ վավերագրական ֆիլմեր, պրեմիերաներ եւ հետահայաց ցուցադրություններ, ստեղծագործական հանդիպումներ եւ վարպետության դասեր, կլոր սեղաններ եւ շնորհանդեսներ»,-ասված Է մամուլի տեղեկագրում:
Փառատոնը կտեւի մինչեւ հոկտեմբերի 5-ը: Փառատոնի արդյունքների ամփոփումից հետո «Եվրասիական կամուրջի» փակման հանդիսավոր արարողության շրջանակներում տեղի կունենա աշնան ամենասպասվող կինոնկարներից մեկի՝ Նիկոլայ Խոմերիկիի «Սառցահատ» ֆիլմի առաջին ցուցադրությունը:
Փառատոնի նախագահներն են Ռուսաստանի ժողովրդական արտիստ Վիկտոր Մերեժկոն եւ Ղրիմի Հանրապետության մշակույթի նախարար ՌԴ մշակույթի վաստակավոր գործիչ Արինա Նովոսելսկայան:
Բաժանորդագրվեք մեր ալիքին Telegram-ում