Հայաստան-Ռուսաստան երիտասարդական համաժողին մասնակցելու են ավելի քան 200 երիտասարդ
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Երևանում հոկտեմբերի 12-ից 14-ը տեղի է ունենալու «Հայացք դեպի ապագա» խորագիրը կրող Հայաստան-Ռուսաստան երիտասարդական երկրորդ համաժողովը: Համաժողովին մասնակցելու են Ռուսաստանից և Հայաստանից ավելի քան 200 ուսանող և երիտասարդական հասարակական կազմակերպությունների ներկայացուցիչներ: Համաժողովը կազմակերպվել է «Հայ-ռուսական երիտասարդական ալյանս» ՀԿ-ի և Ռուսաստանի Դաշնության Հանրային պալատի կողմից:
«Արմենպրես»-ի հաղորդմամբ՝ ինչպես նշեց «Հայ-ռուսական երիտասարդական ալյանս» ՀԿ-ի նախագահ Ռաֆայել Պողոսյանը, համաժողովը իրականացվում է ՌԴ նախագահի կարգադրությամբ տրամադրված միջոցներով և ուղղված է ամրապնդելու երկու երկրների երիտասարդական ՀԿ-ների միջև բարեկամությունը:
«Երիտասարդական համաժողովի նպատակն է միավորել և ամրապնդել երկու երկրների երիտասարդներին: Այն հնարավորություն է տալու երիտասարդներին հանդիպելու եվրասիական ինտեգրման ոլորտում առաջատար փորձագետների հետ և ստանալու իրենց հուզող հարցերի պատասխանները»,- ասաց Պողոսյանը:
Համաժողովը նախատեսում է լիագումար նիստ Եվրասիական տնտեսական հանձնաժողովի, Հայաստանի ու Ռուսաստանի պետական մարմինների ներկայացուցիչների , ինչպես նաև ճանաչված փորձագետների և հասարակական գործիչների մասնակցությամբ:
Բաժանորդագրվեք մեր ալիքին Telegram-ում