Հայաստանում ձգտում են էներգախնայողությամբ նվազեցնել կախվածությունն էներգակիրներից
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Էներգախնայողության ծրագրերը կնվազեցնեն կախվածությունն էներգակիրներից: Այս մասին Երևանում կազմակերպված «Էներգաարդյունավետությունը Հայաստանի բազմաբնակարան շենքերում» թեմայով քննարկման ժամանակ նշեց «Հաբիթաթ ֆոր Հյումենիթի Արմենիա» հիմնադրամի գործադիր տնօրեն Լուիզա Վարդանյանը: Նրա խոսքով, էներգախնայողության ծրագրերը կկրճատեն նաև ջերմոցային գազերի արտանետումը, որը գլոբալ տաքացման պատճառ է:
«Հաբիթաթ ֆոր Հյումենիթի Արմենիա» հիմնադրամը Հայաստանում իրականացնում է մի շարք ծրագրեր, որոնց նպատակն է վերացնել բնակարանային աղքատությունը և բարելավել ցածր եկամուտ ունեցող ընտանիքիների բնակարանային պայմանները: Հիմնադրամն իրականացնում է ծրագրեր` ուղղված տների և բնակարանների վերակառուցմանը և վերանորոգմանը, բազմաբնակարան շենքերի ընդհանուր օգտագործման տարածքների վերանորոգմանն ու էներգաարդյունավետության բարձրացմանը: Ծրագրերից մեկի շրջանակում կատարվել է ուսումնասիրություն` պարզելու էներգախնայողության ոլորտում բնակիչների տեղեկացվածության մակարդակը, նրանց ծախսերը և այլն:
Ըստ ուսումնասիրությունների` ցուրտ եղանակին բազմաբնակարան շենքում բնակիչների 70 տոկոսը տունը ջեռուցելու համար վճարում է 20 000-60 000 դրամ, ամռանը` 5-20 հազար դրամ: Հարցմանը մասնակցած ընտանիքների 61 տոկոսը նրանք էին, որոնց եկամուտը 150 հազար դրամ էր:
«Նրանք այդքան ծախս ունենալով հանդերձ, պատրաստ չէին վճարել, որ կատարվեր շենքի ընդհանուր ջերմամեկուսացում: «Հաբիթաթ» հիմնադրամն առաջարկում է փոքրածավալ, մասնակի միջոցառումներ, որոնք իրենցից ներկայացնում են բազմաբնակարան շենքերի ընդհանուր տարածքների շքամուտքի դռների ջերմամեկուսացում, տանիքի ջերմամեկուսացում և այլն: Սրանք առաջնային լուծումներն են: Վերջերս կատարած էներգետիկ աուդիտի արդյունքում պարզ դարձավ, որ այդ միջոցառումներից հետո գրանցվում է մինչև 7 տոկոս խնայողություն: Եթե արվի ամբողջ շենքի ջերմամեկուսացում, ապա խնայողությունը կկազմի մինչև 60 տոկոս»,-«Արմենպրես»-ի հաղորդմամբ` ասաց Վարդանյանը:
Հիմնադրամի կատարած հարցումները ցույց են տվել, որ էներգախնայողության վերաբերյալ բնակիչների շրջանում տեղեկացվածության պակաս կա:
Բաժանորդագրվեք մեր ալիքին Telegram-ում