ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստան-Իրան ազատ առեւտրի գոտու ստեղծման գործընթացը հնարավոր է փոխանցվի որեւէ մասնավոր ընկերության: Այս մասին տեղեկացրեց ՀՀ էկոնոմիկայի փոխնախարար Հովհաննես Հովհաննիսյանը՝ նշելով, որ գոտու ստեղծման վերաբերյալ քննարկումների արդյունքում երեք առաջադրված տարբերակներից գերակշռողը դա է:

«Ազատ տնտեսական գոտու թեման արդեն բարձրացվել է եւ դարձել քննարկումների առարկա, բայց սա դեռեւս գործնական քայլերի փուլ չէ:  Իրանում առաջիկայում նախատեսվում է հայկական ապրանքների ցուցահանդես. մեր այցի շրջանակում էլ նախատեսում ենք բանակցել այդ ուղղութամբ:  Պետք է օգտագործենք այդ ընթացքը»,- «Արմենպրես»-ի հաղորդմամբ՝ այս մասին նշեց փոխնախարարը:

Հոկտեմբերի 5-8-ը Իրանում անցկացվող հայկական ապրանքների եւ ծառայությունների ցուցահանդեսից Հովհաննես Հովհաննիսյանն ակնկալում է Իրան-Հայաստան գործարարների միջեւ նոր պայմանագրերի կնքում:

«Ունենք որոշակի արդյունքներ հայաստանյան ծառայությունների՝ իրանական շուկա արտահանելու հարցում օրինակ՝ ggtaxi-ն, Ucom-ը:  Հույս ունենք, որ  այս ցուցահանդեսը եւս կնպաստի նոր պայմանագրերի կնքմանը եւ հայկական այլ ապրանքների,  ծառայությունների իրացմանը իրանական շուկայում»,-ասաց Հովհաննես Հովհաննիսյանը: