Հայաստանում գործունեություն է ծավալելու Կայսերական ուղղափառ պաղեստինյան համայնքի ներկայացուցչությունը
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Հայաստանում պաշտոնապես բացվեց Կայսերական ուղղափառ պաղեստինյան համայնքի ներկայացուցչությունը: Միջազգային գիտական, մարդասիրական կազմակերպությունը հիմնադրվել է 1882 թվականին Ռուսաստանում, եւ այժմ գործում է ավելի քան 20 երկրներում:
ՌԴ նախկին վարչապետ, կազմակերպության նախագահ Սերգեյ Ստեպաշինի խոսքով` ներկայացուցչության նպատակներից մեկը կրոնական զբոսաշրջության զարգացումն է:
«Հայաստանը այն քիչ երկրներից մեկն է, որը կարողացել է պահպանել հինավուրց վանքերը, եւ ըստ իս, Ռուսաստանի քաղաքացիները պետք է ոչ միայն այստեղ հանգիստն անցկացնեն, այլեւ լինեն այդ վայրերում»,-«Արմենպրես»-ի հաղորդմամբ` ասաց Սերգեյ Ստեպաշինը:
Նա նշեց, որ կազմակերպության գործունեությունը միտված է Մերձավոր Արեւելքում քրիստոնեության պահպանմանը. մինչ այսօր այնտեղ բազմաթիվ հուշակոթողներ են ոչնչացվել:
«Կրոնական զբոսաշրջությունն իրենից ենթադրում է Հայաստանում, Ռուսաստանում եւ Սուրբ հողում գտնվող սրբավայրերի պահպանումը: Հաջորդ խնդիրը աջակցությունն է նրանց, ովքեր հայտնվել են դժվարության մեջ Մերձավոր Արեւելքում: Հայկական եկեղեցին շատ ամուր հիմքեր ունի այնտեղ` հատկապես Սիրիայում, Լիբանանում, եւ սա այն է, ինչ ես անվանում եմ ազգային դիվանագիտություն»,-ընդգծեց կազմակերպության նախագահը:
Կազմակերպության հայաստանյան ներկայացուցչությունը կղեկավարի Վերահսկիչ պալատի նախագահ Իշխան Զաքարյանը:
Բաժանորդագրվեք մեր ալիքին Telegram-ում