Ազատության հրապարակում մեկնարկած հանրահավաքը հանգրվանեց Բաղրամյան պողոտայում
ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: Երևանի Ազատության հրապարակում տեղի ունեցավ հերթական հավաքը, որի ընթացքում ելույթներ ունեցան Գերագույն խորհրդի նախկին պատգամավոր Ալբերտ Բադասարյանը, երգիչ Ռուբեն Հախվերդյանը, դերասանուհի Թամար Հովհաննիսյանը, հավաքի այլ մասնակիցներ:
«Արմենպրես»-ի փոխանցմամբ` հավաքն ընթացավ առանց հստակ ծրագրի: Խորհրդակցության արդյունքում որոշում կայացվեց երթով նախ շարժվել դեպի Հանրապետության հրապարակ, որտեղ էլ կորոշեն հետագա գործողությունները:
Հասնելով հրապարակ` լրագրողների հետ զրույցում Ալբերտ Բաղդասարյանն ասաց, որ երթը կշարունակեն Նալբադյան փողոցով և Սայաթ-Նովա պողոտայով: Հարցին` դեպի Պարեկապահական ծառայության գունդ` Խորենացի փողոց, երթը շարժվելու է` Բաղդասարյանն անորոշ պատասխան տվեց, այնուհետև երթը շարժվեց դեպի Ֆրանսիայի հրապարակ ու Բաղրամյան պողոտայի սկզբնամասում կանգ առավ: Բաղրամյանում հավաքի մասնակիցներից մեկն ինքնահրկիզվելու փորձ արեց, որը հավաքված քաղաքացիները կանխեցին:
Ավելի վաղ, Երևանի քաղաքապետարանը հայտարարություն էր տարածել և նշել, որ Էրեբունի վարչական շրջանում և դրան հարակից փողոցներում հանրային որևէ միջոցառման իրականացումն արգելվում է: Ոստիկանությունն էլ կոչ էր արել քաղաքի տվյալ հատվածում չանցկացնել երթեր և զանգվածային միջոցառումներ:
Բաժանորդագրվեք մեր ալիքին Telegram-ում