Երեւանի պետական կրկեսն ավարտեց հյուրախաղերը Գեղարքունիքի մարզում
ԳԱՎԱՌ, 29 ՀՈՒԼԻՍԻ, ԱՐՄԵՆՊՐԵՍ: Հուլիսի 28-29-ին Գեղարքունիքի մարզպետ Ռաֆիկ Գրիգորյանի հովանու ներքո Գեղարքունիքի մարզի Գավառ, Սեւան, Մարտունի եւ Վարդենիս քաղաքներում հյուրախաղերով հանդես եկան Երևանի պետական կրկեսի Լեոնիդ Ենգիբարյանի անվան դպրոց-ստուդիայի դերասանները:
Ինչպես «Արմենպրես»-ին տեղեկացրեց Երեւանի պետական կրկեսի գլխավոր ռեժիսոր Նաիրա Պետրոսյանը, կրկեսի դերասանները կրկեսային բազմաժանր համարները հանդիսատեսին ներկայացրին անվճար, լեփլեցուն դահլիճներում:«Մարտունիում ու Վարդենիսում մեր ներկայացումները դիտելու եկան զինվորականներ, Գավառում՝ մանկատան սաները: Դերասանների կողմից ներկայացվեցին աճպարարության, ձեռնածության, յոգայի, օղակային մարմնամարզության, օղակներով խաղի, լիմպոյի, անտիպոտի հետաքրքիր համարներ:Հանդիսատեսների մեջ առավել մեծ թիվ էին կազմում մանկահասակ երեխաներից մինչեւ դպրոցահասակները, որոնց կյանքում, թերեւս, սա առաջին հնարավորությունն էր՝ կրկեսային կենդանի կատարումները տեսնելու: Բոլոր տեղերում էլ մեր կատարումները սկզբից մինչեւ վերջ ներկաները դիմավորել եւ ուղեկցել են ծափողջույններով»,-ներկայացրեց Նաիրա Պետրոսյանը:
Իրենց տպավորություններով կիսվեցին նաեւ հանդիսատես ծնողները: «Հաճելի եւ գնահատելի է, որ այսօր մեր երեխաները, առանց մայրաքաղաք հասնելու եւ առանց այլ ծախսեր կատարելու, անվճար կարողացան նման բազմաժանր կրկեսային ներկայացումներ դիտել: Շնորհակալ ենք թե հովանավորին, թե կրկեսի ղեկավարներին ու դերասաններին, որ մեզ ու մեր երեխաների համար նման զվարճալի համարներ դիտելու հնարավորություն ստեղծեցին»,-«Արմենպրես»-ի հետ զրույցում կրկեսային ներկայացումից հետո Գավառ քաղաքի մշակույթի պալատում նշեցին մի խումբ ծնողներ:
Խոսրով Խլղաթյան
Բաժանորդագրվեք մեր ալիքին Telegram-ում