Բնապահպանության նախարարն ընդունել է KFW բանկի ներկայացուցիչներին
ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: ՀՀ բնապահպանության նախարար Արամայիս Գրիգորյանը հուլիսի 28-ին ընդունել է KFW բանկի ներկայացուցիչներին:
Ինչպես «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի վարչությունից, հանդիպման ընթացքում KFW բանկի Արևելյան Եվրոպայի, Կովկասի և Կենտրոնական Ասիայի տնօրեն Եվա Վիտտը, շնորհակալություն հայտնելով ընդունելության համար, նշել է, որ Հարավային Կովկասի տարածաշրջանի տնօրեն պարոն Լարս Օերմանն ավարտում է իր լիազորությունները՝ փոխանցելով դրանք նորանշանակ տնօրեն Քլաուս Վայգելին:
ՀՀ բնապահպանության նախարարը, շնորհակալություն հայտնելով գործող տնօրեն Լարս Օերմանին և բարձր գնահատելով սերտ ու վստահելի համագործակցության փորձը, հույս է հայտնել, որ ձևավորված գործընկերային հարաբերությունները կշարունակվեն նաև Քլաուս Վայգելի տնօրինության ժամանակահատվածում:
Քլաուս Վայգելը շնորհակալություն է հայտնել մաղթանքի համար և շեշտել. «Ես բազմիցս լսել եմ ՀՀ բնապահպանության նախարարություն – KFW բանկ վստահելի համագործակցության մասին և կանեմ առավելագույնն այդ կայուն հիմքերն ավելի ամրապնդելու և ընդլայնելու ուղղությամբ»:
Հանդիպման ընթացքում կողմերը քննարկել են ՀՀ բնապահպանության նախարարության և KFW բանկի միջև համագործակցության շրջանակներում իրականացվող ընթացիկ ծրագրերը:
Անդրադառնալով առաջիկա անելիքներին, մասնավորապես, Արարատյան դաշտի ստորերկրյա ջրերի պահպանության և արդյունավետ կառավարման վերաբերյալ ձեռք բերված նախնական պայմանավորվածություններին, KFW բանկի ներկայացուցիչները նշել են, որ ներկայում տարվում են աշխատանքներ՝ որոնց արդյունքում առաջիկայում նախատեսվում է կնքել համագործակցության պայմանագիրը:
Բաժանորդագրվեք մեր ալիքին Telegram-ում