Մերկելը չի հասկանում ցեղասպանության ճանաչման պատճառով Թուրքիայի կողմից Բունդեսթագին ներկայացվող մեղադրանքները
ԵՐԵՎԱՆ, 7 ՀՈՒՆԻՍԻ, ԱՐՄԵՆՊՐԵՍ: Գերմանիայի կանցլեր Անգելա Մերկելը հունիսի 7-ին Բեռլինում Ադրբեջանի նախագահ Իլհամ Ալիեւի հետ համատեղ անցկացված մամուլի ասուլիսում լրագրողներին հայտարարել է, թե անհասկանալի են Թուրքիայի կողմից Գերմանիայի Բունդեսթագի պատգամավորների հասցեին հնչող պահանջներն ու մեղադրանքները, որոնք քվեարկել են 1915 թվականին Օսմանյան կայսրությունում Հայոց ցեղասպանության ճանաչման բանաձեւի օգտին:
«Գերմանիայի Բունդեսթագի կողմից ընդունված բանաձեւի կապակցությամբ հայտնի է, որ գոյություն ունի Գերմանիայի Բունդեսթագի եւ թուրքական կողմի երկու տարբեր կարծիք: Այդ կապակցությամբ ես անձամբ կշարունակեմ… հանդես գալ Հայաստանի եւ Թուրքիայի միջեւ ուղղակի բանակցություններ սկսելու օգտին: Գերմանիայի Բունդեսթագի պատգամավորներն, առանց բացառության, ազատորեն ընտրված պատգամավորներ են, եւ այն պահանջներն ու հայտարարությունները, որոնք այժմ հնչում են Թուրքիայի կողմից, ես անհասկանալի եմ համարում»,-ասել է Մերկելը՝ մեկնաբանելով Գերմանիայի ծագումով թուրք խորհրդարանականների հասցեին Թուրքիայի նախագահ Թայիփ Էրդողանի արած հայտարարությունը, որը նրանց, մասնավորապես, մեղադրել է հայրենասիրության եւ իրենց երակներում թուրքական արյան բացակայության մեջ:
Բաժանորդագրվեք մեր ալիքին Telegram-ում